Fındıq, kivi və ispanaqla qüsursuz dəri…

Qış mövsümündə soyuq hava, külək və uzun müddət qapalı məkanlarda qalmaq dərimizi korlayır. Ancaq bu o demək deyil ki, gözəl görünmək üçün baharı gözləməliyik. Əksinə, qış aylarında dəri qulluğuna daha çox vaxt ayırmalıyıq.

Publika.az qış fəslində dərini gözəlləşdirməyin üsullarını təqdim edir:

Dəri gözəlliyi üçün ən önəmli vasitələrdən biri C vitaminidir. C vitamini dərini gəncləşdirməklə yanaşı, nəmləndirir və parıltı verir. Kivi, cəfəri, portağal, naringi, qreypfrut və brokkoli yeyərək orqanizminizi C vitamini ilə təmin edə bilərsiniz. C vitamini hər gün qəbul edilməlidir. Odur ki, sadaladığımız qidalardan ən az ikisini menyunuza daxil etməlisiniz.

Qeyd edək ki, 100 qram kivi gündəlik C vitamini ehtiyacını tamamilə ödəyir.

A vitamini də dəri üçün çox faydalıdır. Çünku bu vitamin dərinin nəm balansını tarazlaşdırır. Kök, ispanaq, bibər, brokkoli, kələm, göyərtilər, naringi, portağal və qayısı A vitamini ilə zəngindir. Yumurta, süd, kərəyağı, qaraciyər və pendir də A vitamini ehtiva edən qidalardır. Gündə yarım kasa ispanaq gündəlik A vitamini ehtiyacınızı tamamilə təmin edəcək.

E vitamini isə antioksidant xüsusiyyətinə görə digər vitaminlərdən daha effektlidir. Dəri hüceyrələrini yeniləyir, dərinin yaşlanma sürətini azaldır. Taxıl növləri, fındıq, qoz, balqabaq tumu, yumurtanın sarısı, zeytun yağı, balıq yağı, pomidor, kartof, kələm və kahı E vitamini baxımından zəngindir. Bir ovuc fındıq və ya 4-5 ədəd qoz gündəlik E vitamini ehtiyacını ödəyir.

Bunlardan yeyərək nəinki sağlamlığınızın, həm də gözəlliyinizin qayğısına qala bilərsiniz.

Ləman Sultan