Heyva tumundan möcüzəvi maskalar

Heyva tumu vitamin, mineral və antioksidantlarla zəngindir. Bu səbəbdən dərini nəmləndirir, dəridəki qızartını azaldır, daha qüsursuz görünməyə kömək edir. Xüsusilə də, həssas dəri üçün çox faydalıdır.

Publika.az heyva tumundan hazırlanan ən gözəl maskaları təqdim edir:

Dəri ləkələrinə və qırışlara qarşı maska:

10 qram heyva tumunu əzərək toz halına gətirin. Bu tozu 1 armudu stəkan gülabla qarışdırın. Bunun üçün də taxta qaşıqdan istifadə etməyiniz məsləhətdir. Qarışıq gel halına gəldikdən sonra təmiz dəriyə çəkin. 10 dəqiqə gözlədikdən sonra ilıq su ilə təmizləyin.

Göz ətrafı qırışlar üçün maska:

1 fincan gülabla 2 xörək qaşığı heyva tumundan əldə edilən tozu və 1 çay qaşığı buğda toxumu yağını qarışdırın. Bu qarışığı göz ətrafına çəkib dairəvi hərəkətlərlə masaj edin. 20-30 dəqiqə sonra ilıq su ilə təmizləyin.

Saçları möhkəmləndirən maska:

1 xörək qaşığı heyva tumunu 2 stəkan suda qaynadın. Daha sonra suyu süzüb tumları əzin. Əldə etdiyiniz püreni saç uclarına çəkib 10-20 dəqiqə gözləyin. Daha sonra saçı ilıq su ilə yuyun. Bu maskanı həftədə bir dəfə çəkmək məsləhətdir.

Ləman Sultan