Burundakı qara nöqtələrə qarşı təbii maskalar

Burunda meydana gələn qara nöqtələr həm kişiləri, həm də qadınları narahat edən problemlərdən biridir.

Publika.az-ın təqdim etdiyi maskalar sayəsində qara nöqtələrlə vidalaşa bilərsiniz.

1.Soda maskası

1 xörək qaşığı soda ilə eyni miqdarda mineral suyu qarışdırın. Maskanı burun nahiyəsinə çəkib masajla dəriyə yedizdirin. 5-10 dəqiqə gözlədikdən sonra ilıq su ilə təmizləyin.

Soda maskası dərini dərindən təmizləyir, hamarlaşdırır və dərini qara nöqtələrdən ən az 3 gün müdafiə edir. Maskadan həftədə 1-2 dəfə istifadə etmək lazımdır.

Qeyd edək ki, allergiya ehtimalına qarşı maskanı öncə biləyinizə çəkib 5-10 dəqiqə gözləməli daha sonra istifadə etməlisiniz.

2. Gil maskası

Qara nöqtələr əsasən yağlı dəridə müşahidə edilir. Gil isə dəridəki artıq yağı təmizləyən ən yaxşı vasitədir. Ona görə də, qara nöqtələrə qarşı mübarizədə gildən faydalana bilərsiniz.

1 çay qaşığı yaşıl gili bir az su ilə qarışdırıb məcun əldə edin. Maskanı burun nahiyəsinə çəkib 15 dəqiqə saxlayın. Daha sonra soyuq su ilə yuyub təmizləyin. Maska həftədə bir dəfə çəkilməli, maskadan sonra mütləq nəmləndirici kremdən istifadə edilməlidir.

3. Yumurta ağı maskası

Salfeti yumurtanın ağına bulayıb burun nahiyəsinə yapışdırın. Salfet quruyana kimi gözləyin. Daha sonra salfeti dartıb qopardın. Həssas dəriyə sahib olanlar əvvəlcə salfeti isladıb sonra təmizləməlidirlər.

Yumurta ağı qara nöqtələri təmizləməklə yanaşı, onların yenidən yaranmasını da gecikdirir. Bu maskadan öncə də mütləq allergiya testi edin.

Ləman Sultan