Gözəlləşmək heç vaxt belə asan olmamışdı: qəhvə möcüzəsi

Dərini təravətli saxlamağın əsas yolu hüceyrələri qorumaq və onları yeniləyən məhsullardan istifadə eləməkdir.

Mütəxəssislər bildirir ki, bu baxımdan qəhvə ən bahalı kremlərdən daha təsirlidir. Çünki dəridə qan dövranını sürətləndirərək hüceyrələrin daha sürətlə yenilənməsini təmin edir. Qəhvənin tərkibindəki antioksidantlar yaşlanma əlamətlərini yox edir, qırışları açır.

Gözaltı halqalardan xilas olmaq, dərini ölü hüceyrələrdən təmizləmək üçün də qəhvədən istifadə eləmək olar.

Publika.az-ın təqdim elədiyi qəhvə maskalarının köməyilə siz də asanlıqla gözəlləşəcəksiniz.

Dərini hamarlaşdıran maska:

Tərkibi:

2 çay qaşığı türk qəhvəsi çöküntüsü

1 çay qaşığı limon şirəsi

1 çay qaşığı kakao tozu

1 çay qaşığı bal

1 çay qaşığı süd

Hazırlanması və tətbiqi:

Qəhvə və kakaonu südlə qarışdırıb limon şirəsi əlavə edin. Sonra bal əlavə edib krem halına gələnə kimi qarışdırın. Daha sonra fırçayla maskanı təmiz dəriyə çəkin. On dəqiqə gözləyib ilıq su ilə təmizləyin.

Quru dəri tipi üçün maska:

Tərkibi:

1 çay qaşığı türk qəhvəsi çöküntüsü

1 çay qaşığı təbii zeytun yağı

Hazırlanması və tətbiqi:

Məhsulları qarışdırıb maskanı üzünüzə və boynunuza çəkin. 10 dəqiqə gözləyib soyuq su ilə yuyunun. Bu maskanı həftədə bir dəfə çəkməlisiniz.

Ləman Sultan