Baş dərisindəki sızanaqlardan bu üsullarla xilas olun

Hormonal problemlər, istifadə edilən şampunun düzgün seçilməməsi, bakteriyaların toplanması və ölü hüceyrələrin məsamələrdə yığılıb qalması sızanaq meydana gətirir. Mütəxəssislər stress və yorğunluğun da baş dərisində sızanağa səbəb ola biləcəyini vurğulayırlar.

Publika.az-ın təqdim etdiyi aşağıdakı üsullar sayəsində bu problemdən qısa müddətdə azad olmaq mümkündür:

Pomidor maskası

1 qaşıq pomidor şirəsi ilə bir neçə damcı limon şirəsini və yarım qaşıq balı qarışdırın. Bu maskanı sızanaqların olduğu nahiyələrə çəkin. 5 dəqiqə gözlədikdən sonra saçı ilıq su ilə yuyub təmizləyin.

Pomidor püresi

Maska hazırlamağa vaxtınız yoxdursa, bir neçə ədəd pomidoru blenderdən keçirin. Əldə etdiyiniz püreni saç dərisinə yaxıb 15 dəqiqə sonra yuyun.

Alma sirkəsi

Alma sirkəsi də sızanaqlara qarşı təsirlidir. 1 stəkan alma sirkəsini eyni miqdarda su ilə qarışdırın. Saçları adi qaydada şampunlayıb yuduqdan sonra sirkəli su ilə yaxalayın.

Əzvay yarpağı

Aloe-vera (əzvay) yarpağını kəsib, şirəsini sızanaqların üzərinə çəkin. Təmizləmək lazım deyil. Bu proseduranı həftədə iki dəfə təkrarlamağınız kifayətdir.

Ləman Sultan