Cariyələr kimi görünmək olar – ÖZÜ DƏ BELƏ

Gözəl görünmək qadınların ən çox əhəmiyyət verdiyi məsələ olub. Gözəllik üçün nə qurbanlar verilib, nələrə əl atılıb? Bu sualın cavabını heç tarix də bilmir.

Hərəmxanada gözəlliyi ilə diqqət çəkən qadınların həyat şərtləri daha yaxşı olurdu. Onlar asanlıqla sultanların sevimli cariyələrindən birinə çevrilirdilər. Osmanlı İmperiyası dövründə hərəmlərdəki cariyələrin daha gözəl görünmək üçün bir-birləri ilə yarışırdılar. Tarixçilər bir xeyli vasitələrin adını çəkib bu yarışmanın silahlarını bizə ötürüblər.

Publika.az cariyələrin gözəllik sirrlərini təqdim edir:

Dəriyə qulluq

Günün böyük hissəsini hamamda keçirən qadınlar üçün qüsursuz dəriyə sahib olmaq çox əhəmiyyətli idi. Ona görə də, tez-tez kisələnir, dərini ölü hüceyrələrdən təmizləyirdilər. Beləliklə, dəriləri daha parlaq görünür və yumşaq olurdu. Cariyələr gözəlləşmək üçün təbii yağlardan da istifadə edirdilər. Bir stəkan balqabaq tumunu həvəngdəstədə döyüb üzərinə bir stəkan zeytun yağı və bir xörək qaşığı gül yağı əlavə edirdilər. Bu qarışığı bir həftə qaranlıq yerdə, ağzı bağlı qabda saxlayırdılar. Hər dəfə hamamdan çıxanda bütün bədəni bu yağla masaj edirdilər. Nəticədə dərinin nəm balansı qorunur, sellülit, çatlaq kimi dəri problemlərinin qarşısı alınırdı.

Limon möcüzəsi

Cariyələr limonu ortadan kəsib onunla üzlərini və əllərini masaj edirdilər. Bununla da dərinin rəngini ağardır, sızanaqların qarşısını alırdılar.

Safiyə Sultanın saç lasyonu

O dövrdə saçları sabunla yuyurdular. Bu isə saçların həddən artıq qurumasına səbəb olurdu. Lakin Osmanlı sultanı III Muradın həyat yoldaşı Safiyə Sultan bu problemə çarə tapmışdı. O, saçlarının daim gözəl görünməsi üçün xüsusi lasyondan istifadə edirdi. Bu lasyonu əldə etmək üçün bir stəkan əməköməci ilə eyni miqdarda Məkkə gülünü (hibiscus) 1 litr suda 15 dəqiqə qaynadıb süzmək lazım gəlirdi. Safiyə Sultan saçlarını adi qaydada yuyub təmizlədikdən sonra bu losyondan istifadə edirdi. Nəticədə saçları daha sağlam və parlaq görünürdü.

Gül qoxulu ənlik və dodaq boyası:

O dövrdə kosmetik vasitələr yox idi. Ancaq qadınlar gözəl görünməyin yollarını tapmışdılar. Məsələn, yanaqlarını rəngləndirmək üçün 1 stəkan gül ilə yarım stəkan Məkkə gülünü (hibiscus) həvəngdəstədə döyüb ondan ənlik kimi istifadə edirdilər. Bu qarışığa bir az isti su əlavə edib dodaqlara da çəkmək olurdu.

Cariyələrin albalı sevgisi

Cariyələr incə görünmək üçün qidalanma rejimlərinə diqqət edirdilər. Cariyələrin ən çox sevdikləri meyvələrdən biri də albalı idi. Çünki albalı qanı və bağırsaqları təmizləyir, həmçinin, arıqlamağa kömək edirdi.

Ətir əvəzinə gülab

Gülab cariyələrin ən çox istifadə etdikləri gözəllik vasitələrindən biri idi. Onlar üzlərini gülabla təmizləyirdilər. Çox vaxt ətir əvəzinə gülabdan istifadə olunurdu. Gözəl ətir saçmaq istəyən cariyələr gülabı kiçik şüşələrə qoyaraq, daim yanlarında gəzdirirdilər.

Gil

Cariyələr tərkibi gil və sudan ibarət olan maskalar çəkirdilər. Gil sayəsində dərini nəmləndirir, sızanaqların qarşısını alırdılar.

Ləman Sultan