Dəfnə hazırlanan meyit dirildi: Həkimlərin növbəti səhlənkarlığı

Braziliyada dəfn bürosunun əməkdaşları həkimin rəsmən öldüyünü elan etdiyi yaşlı kişini son anda ölümün pəncəsindən qurtarıblar.

Publika.az xəbər verir ki, hadisə ölkənin San-Paulu ştatında qeydə alınıb.

Tənəffüs çatışmazlığı diaqnozu ilə xəstəxanaya çatdırılan 88 yaşlı Jurasi Rosa Alves həkim müayinəsindən sonra rəsmən ölü elan edilib. Həkimlər qocanın dünyasını dəyişdiyini bildirərək onun yaxınlarına xəbər veriblər və meyiti dəfnə hazırlanması üçün dərhal morqa göndəriblər.

Mərasimə hazırlıq görən morq işçiləri qəfildən onun tərpəndiyini və nəfəs aldığını fərq ediblər. Qorxu və şok içində qalan əməkdaşlar özlərini itirməyərək yaşlı kişiyə ilk tibbi yardımı göstərib və dərhal təcili yardım çağırıblar. Hazırda yenidən xəstəxanaya çatdırılan braziliyalının vəziyyəti həkim nəzarətindədir.

Qocanın yaxınları qorxunc səhvə yol verən həkimdən polisə şikayət ediblər. Hüquq-mühafizə orqanları tibbi personalın laqeydliyi və lazımi yardımın vaxtında göstərilməməsi maddəsi ilə cinayət işi açıb.

Ailənin vəkili mətbuata açıqlamasında bildirib ki, qocanın vəziyyətinin kritikləşməsinə məhz həkimin səhlənkarlığı və vaxtında reanimasiya tədbirlərinin görülməməsi səbəb olub.

Müəllif: Adəm