Ayı onu ikinci dəfə şikəst etdi: Bu dəfə qolunu qopardı - FOTO

Rusiyanın Ussuriysk şəhərində tanınmış heyvan müdafiəçisi Vera Bliş ayı hücumu nəticəsində ağır xəsarət alıb. O, bu dəfə qolunu itirib.

Publika.az xəbər verir ki, bu barədə "Amur Mash" teleqram kanalı məlumat yayıb.

Bildirilib ki, hadisə "Dora" zookompleksində baş verib. Himalay ayısı Veranın qolunu qopardıqdan sonra o, təcili xəstəxanaya çatdırılıb, hazırda reanimasiya şöbəsində müalicə olunur və süni tənəffüs aparatına qoşulub.

Məlumata görə, Vera Bliş 30 ildən artıq ayılarla işləyib. O, əvvəlcə təlimçi kimi fəaliyyət göstərib, sonradan isə qəhvəyi və Himalay ayılarının xilas edilməsi ilə məşğul olub. 2015-ci ildə Ussuriyskdə daşqın zamanı su altında qalan zooparkdan ayıların xilas edilməsində iştirak edib və onun səyləri nəticəsində şəhərdə yeni zoopark yaradılıb.

Qeyd edək ki, bu, Veranın ayı hücumu nəticəsində ilk ağır xəsarəti deyil. 2019-cu ildə "Manyunya" adlı dişi ayı yemləmə zamanı onunla oynayarkən qadının dizdən aşağı ayağını qoparmışdı. Həmin vaxt Vera Bliş baş verənlərə görə ayını deyil, özünü günahlandırmışdı. Bu dəfə isə ayı hücumu onun qolunun amputasiyası ilə nəticələnib.

Adəm