Kamran Əliyev: "Yaxın vaxtda Azərbaycan pasportu alacam"

"Sumqayıt"ın qış transfer pəncərəsində Rusiyanın "Ximki" klubundan heyətinə qatdığı azərbaycanlı futbolçu Kamran Əliyev "Turan Tovuz"la oyundan (3:2) sonra Publika.az-a müsahibə verib

O, bir sıra maraqlı məqamlara aydınlıq gətirib:

- İlk dəfə Tovuzda olurdun, ab-hava necə idi, ümumiyyətlə, səfər qələbəsini necə şərh edərdin?

- Turnir cədvəli baxımından çox vacib oyun idi. Həm də bizim üçün prinsipial oyun idi. Sağ olsun, uşaqlar hamısı əla oynadı, son dəqiqəyə kimi mübarizə apardılar və yekunda 3 xalı qazandıq. Stadionda atmosfer də yaxşı idi, Tovuz azarkeşləri də komandalarına son dəqiqəyə qədər dəstək verdilər.

- "Sumqayıt"da qol hesabını dublla açdın. Bunu gözləyirdin?

- Gözləyirdim. Çünki hər zaman cəhd edirdəm ki, daha yaxşı oynayım və komandama bacardığım qədər kömək edim.

- Uyğunlaşma dövrünü çox tez keçdiyini demək olar? Çünki qış toplanışında da iştirak etməmişdin...

- Düz qeyd etdiniz, mənim üçün yeganə problem bu idi. Çünki Rusiyadan ayrılmağım elə alındı ki, "Sumqayıt"ın qış toplanışında iştirak etməmişdim. Ardınca çempionat başladı. İndi artıq 90 faiz forma yığdığımı düşünürəm.

- Azərbaycanlı olsan da, "Sumqayıt"da legioner kimi oynayırsan. Azərbaycan pasportu almağına nə mane olur?

- Mənə heç nə mane olmur. Heç bir problem də yoxdur. Yaxın gələcəkdə Azərbaycan pasportu alacam.

- Çempionatda autsayder mövqeyindəsiniz. Bu haqda nə düşünürsən?

- Autsayder olduğumuzu düşünmürəm. Sadəcə bu cür alındı. Komanda yeni-yeni bir-birini tanıyır, əksəriyyət qışda komandaya qoşuldu. Həta baş məşqçimiz özü də mövsümün ortasında gəldi. Bir sözlə, yeni-yeni hamı bir-birinə uyğunlaşır.

- 24 yaşın var. Azərbaycan çempionatından tramplin kimi istifadə etməyi düşünürsən, ya necə?

- Tramplin kimi də demək olar. Doğma vətənimdən təkllif gəldi, mən də mənmuniyyətlə qəbul etdim.

- Komandanın potensialını necə görürsən? Həm bu mövsüm, həm də növbəti mövsüm üçün...

- Bu mövsüm Premyer Liqanı tərtk etməyəcəyimizə hətta 200 faiz əminəm. Növbəti mövsüm üçün avrokuboklara vəsiqə uğurunda mübarizə aparacağıq.

Heybət Məmmədov