“Real” - Mbappe danışıqlarının təfərrüatları açıqlandı

PSJ-nin hücumçusu Kilian Mbappe ilə “Real Madrid” arasındakı danışıqlar prosesinin təfərrüatları açıqlanıb.

Publika.az xəbər verir ki, təfərrüatları “Marca” nəşrinin jurnalisti Karlos Karpio açıqlayıb.

“Real” və Mbappe arasında razılaşma çox yaxındır. Ssenari artıq 2022-ci ildəki kimi deyil. Qətər artıq Kilianın PSJ layihəsində mövcudluğunu iki il əvvəlki kimi strateji əhəmiyyətli və fundamental hesab etmir.

Hazırda oyunçunun imza bonusu və imic hüquqlarının necə ödəniləcəyi ilə bağlı danışıqlar aparılır. Anası imic hüquqları üçün pul ödənilməsində israrlıdır, lakin Mbappe anasına “Real”da oynamaq istədiyini açıq şəkildə bildirib.

Kilian Madrid klubuna keçmək üçün pul itirməyə hazırdır. “Real”a getsə, PSJ-də qazandığının yarısını, Vinisius Juniorun isə indi qazandığının üç qatını alacaq. Mbappe ilə Madridin artıq razılığa gəldiyini istisna etmirəm”, - “Madrid Universal” X sosial şəbəkəsində (keçmiş Twitter) Karpiodan sitat gətirib.

Bu mövsüm Mbappe klub üçün bütün yarışlarda 29 matçda iştirak edib, 30 qol vurub və 7 məhsuldar ötürmə edib.