AFFA-da ciddi dəyişikliklər olacaq: Rəsmən açıqlandı

"AFFA-nın hazırkı strukturu tələblərə cavab vermir".

Publika.az xəbər verir ki, bu sözləri AFFA-nın baş katibi Cahangir Fərəcullayev qurumun Hesabat Konfransında bildirib. O, Azərbaycan futbolunun hazırkı durumunun yaxşı olmadığını bildirib:

"Əsas millimizin nəticələri hamımızı üzür. Avropa futbolunda autsayderlər sırasındayıq. Bu vəziyyətdən çıxmalıyıq. Bunun üçün İnkişaf Strategiyası qəbul olundu. Düzgün plan uğurlu işin yarısıdır. Strategiyanın həyata keçirilməsi gündəlik işimizə çevrilib. AFFA-da kadr çatışmazlığı var. Müasir futbol idarəçiliyi qarşımıza ciddi tələblər qoyur. Ona görə AFFA-nın strukturunda ciddi dəyişikliklər olacaq. Hər şeyi sıfırdan başlamalıyıq. Yalnız bunu gerçəkləşdirməklə, strategiyanı həyata keçirmək olar. Bundan ötrü xüsusi qrup yaradılacaq".

Baş katib uşaq futbolunda ciddi problemlərin olduğunu etiraf edib:

“Bunun üçün yaxşı infrastruktur lazımdır. Hazırda bir nömrəli problem məşqçi qıtlığıdır. 10 milyonluq ölkə üçün cəmi 7 təlimçimiz və qapıçı üzrə 1 instruktorumuz var var. Ona görə təlimçi yetişdirməliyik. Halbuki 4 milyonluq Xorvatiyada 145 belə mütəxəssis çalışır. Bunun üçün müəyyən vaxt lazımdır. AFFA tərəfindən təkliflər paketi hazırlanıb müvafiq qurumlara təqdim olunacaq”.

Heybət