Mourinyo "bəraət"i: Problem "Çelsi"yə məğlubiyyət deyil, “Qarabağ”a məğlubiyyətdir”

"Benfika"nın baş məşqçisi Joze Mourinyo Çempionlar Liqasının əsas mərhələsinin ikinci turunda "Çelsi"yə 0:1 hesabı ilə uduzduqları oyunu şərh edib.

Publika.az xəbər verir ki, portuqaliyalı çalışdırıcı yenə "Qarabağ"a məğlubiyyəti xatırladıb:

"Matçlar arasında iki günümüz var idi və biz məşq etmədik, yalnız bərpa prosesi keçirdik. Əgər belə ifadə etmək mümkündürsə, meydanda mənim güclü tərəflərimdən biri məşqlərimdir, amma buna vaxtımız olmadı. Hazırda oyunçular üzərində böyük təzyiq dövrü davam edir və bu görüşdən əvvəl onlara sadəcə dedim ki, məğlubiyyətlər də olur, amma onların arasında fərqli olanlar var. Bugünkü nəticə onlar üçün baza ola bilər, çünki buradan heç-heçə ilə də dönə bilərdik və bu, onlar üçün pozitiv olardı.

Biz intizamlı oynadıq, "Çelsi"ni yaxşı öyrənmişdik və düşünürəm ki, meydandakı sxemləri ilə yaxşı mübarizə apardıq. Müdafiədə əla çıxış etdik, amma sonra çətinliklər yarandı: üç mərkəz yarımmüdafiəçimiz sarı vərəqə aldı və çox dəyişikliklər etməyə məcbur olduq. Bunun öhdəsindən də yaxşı gəldik.

Problem "Çelsi"yə məğlubiyyətdə deyil, "Qarabağ"a məğlubiyyətdədir. Bu gündən sonra da üç xalımız olmalı idi və indi onları haradasa qazanmalıyıq. Düşünürəm ki, bu gün bir xal almaq üçün kifayət qədər iş gördük, amma yenə də bunu bacara bilmədik. Komandamız özünəinam qazanır. Çalışdıq. Bu, kifayət etmədi, amma UEFA-nın fikri müsbətdir".

Qeyd edək ki, "Benfika" ilk turda doğma meydanda Azərbaycan təmsilçisi “Qarabağ”a 2:3 hesabı ilə məğlub olub. Klub bundan sonra baş məşqçi Bruno Lajı istefaya göndərib və onun yerinə Mourinyo təyin olunub.

Heybət