Premyer Liqada ara qarışdı: Bu klub maaşla bağlı səsverməni blokladı

İngiltərə Premyer Liqası rəhbərliyinin klubların xərclərinə sərt hədd - “maaş limiti” tətbiq etmək planları təhlükə altına düşüb.

Publika.az xəbər verir ki, bu barədə "The Times" məlumat yayıb.

Cümə günü yeni maliyyə qaydaları ilə bağlı keçirilməsi nəzərdə tutulan səsvermə "Arsenal" klubunun müdaxiləsindən sonra ləğv edilib.

London təmsilçisi digər klublara və Premyer Liqa rəhbərliyinə ciddi xəbərdarlıq edib. Klubun mövqeyinə görə, Peşəkar Futbolçular Assosiasiyasının (PFA) razılığı olmadan xərclər limitinin tətbiqi hüquqi baxımdan çox risklidir.

London klubu hesab edir ki, liqa bu addımı atsaydı, PFA dərhal məhkəməyə müraciət edəcəkdi və Premyer Liqanın bu işi udmaq şansı çox aşağı görünür.

"Arsenal"ın mövqeyini "Aston Villa" da dəstəkləyib. Hər iki klub düşünür ki, futbolçularla kollektiv müqavilə olmadan maaş limitlərinin tətbiqi əmək qanunvericiliyinin pozulması deməkdir.

Müzakirəyə çıxarılması nəzərdə tutulan təklif “ankraj sistemi” adlanırdı. Bu sistemə əsasən, ən varlı klubların xərcləri liqada sonuncu yeri tutan komandanın gəlirləri ilə müəyyən bir əmsala uyğun əlaqələndiriləcəkdi. Lakin uzunmüddətli məhkəmə prosesləri və futbolçuların mümkün tətili təhlükəsi üzündən səsvermə qeyri-müəyyən vaxta qədər təxirə salınıb.

İndi Premyer Liqa maliyyə feyr-pleyini tənzimləmək üçün yeni yollar axtarmağa məcburdur. Çempionat rəhbərliyi həm top klublar, həm orta səviyyəli komandalar, həm də futbolçuların həmkarlar ittifaqı ilə kompromis tapmağa çalışır.

Heybət