Konfrans Liqasının bütün pley-offçuları müəyyənləşdi

UEFA Konfrans Liqasında ümumi mərhələnin 6-cı turunun oyunları başa çatıb.

Publika.az xəbər verir ki, bununla növbəti mərhələyə yüksələn 24 komandanın adı məlum olub.

Türkiyəli mütəxəssis Arda Turanın rəhbərlik etdiyi “Şaxtyor Donetsk” Xorvatiyanın “Riyeka” klubu ilə heç-heçə edib və turnir cədvəlini 5-ci pillədə tamamlayıb.

“Şaxtyor”la yanaşı, birbaşa 1/8 finala vəsiqə qazanan komandalar Fransa təmsilçisi “Strasburq”, Polşadan “Rakuv”, Yunanıstanın AEK klubu, Çexiyanın “Sparta”sı, İspaniyanın “Rayo Valyekano”su, Almaniyanın “Maynts”ı və Kiprin AEK (Larnaka) komandası olub.

9–24-cü yerləri tutan komandalar pley-off raunduna yüksəlib. Bunlar İsveçrənin “Lozanna”, İngiltərənin “Kristal Pelas”, Polşanın “Lex”, Türkiyənin “Samsunspor”, Sloveniyanın “Selye”, Niderlandın AZ (Alkmaar), İtaliyanın “Fiorentina”, Xorvatiyanın “Riyeka”, Polşanın “Yaqelloniya”, Kiprin “Omoniya”, Ermənistanın “Noa”, Kosovonun “Drita”, Finlandiyanın KuPS, Şimali Makedoniyanın “Şkendiya”, Bosniya və Herseqovinanın “Zrinski” və Çexiyanın “Siqma” klublarıdır.

Pley-off raundunun püşkatma mərasimi gələn ilin yanvarın 16-da keçiriləcək. Bu mərhələnin oyunları isə 19 və 26 fevral tarixlərində baş tutacaq.

Heybət