Trampın çıxışı İsraili təşvişə saldı: Bu ölkələr İrandan asılı vəziyyətə düşəcək

ABŞ-ın Hörmüz boğazı ilə bağlı mövqeyi və regionda dəyişən geosiyasi balanslar İsrail kəşfiyyatında ciddi narahatlıq yaradıb. İsrail hərbi kəşfiyyatının sabiq yüksək rütbəli rəsmisi, İran üzrə mütəxəssis Denni Tsitrinovits "Politico" nəşrinə açıqlamasında sensasion xəbərdarlıqlar edib.

Publika.az xəbər verir ki, ekspert Hörmüz boğazının təhlükəsizliyi məsələsinin digər ölkələrin öhdəsinə buraxılmasının Tehranın regiondakı mövqelərini görünməmiş dərəcədə gücləndirəcəyini bildirib.

Tsitrinovitsin sözlərinə görə, bu ssenari Körfəz ölkələri üçün fəlakətlə nəticələnə bilər: "Bu, region dövlətləri üçün çox pis olacaq. Onlar hər mənada İrandan asılı vəziyyətə düşəcəklər, çünki İran onları faktiki olaraq girov saxlayacaq".

Ekspert qeyd edib ki, yaranmış vəziyyət Tehrana enerji daşıyıcılarının nəqli üçün xüsusi rüsumlar tətbiq etmək imkanı verəcək. Bu isə İranın həm iqtisadi, həm də siyasi nüfuzunu artıracaq, Qərbin sanksiya rıçaqlarını zəiflədəcək. Nəticədə, Avropa və Asiya ölkələri İranla daha sıx danışıqlara getmək məcburiyyətində qalacaqlar.

Müəllif: Adəm