Ukraynaya qarşı rus-erməni təxribatı

Ukrayna Futbol Assosiasiyası (UAF) 2026-cı il Avropa Futzal Çempionatında Ukrayna və Ermənistan milli komandaları arasında keçirilən oyun zamanı baş verən hadisə ilə bağlı UEFA-nın Nəzarət, Etika və İntizam Orqanına müraciət edib.

Publika.az xəbər verir ki, bu barədə UAF-ın rəsmi saytı məlumat yayıb.

Oyundan dərhal sonra Ermənistan millisinin oyunçusu Denis Nevedrov Ukraynaya qarşı söyüş söyüb. Futzalçının açıq çıxışları oyunun yayımı zamanı kameraya düşüb.

UAF Ermənistan milli komandasının oyunçusunun hərəkətlərini idmançıya yaraşmayan davranış hesab edir və bu, İntizam Qaydalarının pozulmasıdır.

Belə hallarda UEFA İntizam Qaydaları on oyunluq cəza nəzərdə tutur.

UEFA-ya göndərilən məktubda deyilir ki, “sözügedən oyunçu Rusiya əsillidir və Rusiya Federasiyasının vətəndaşıdır”. Təcavüzkar ölkə Ukraynanı məhv etmək məqsədi ilə bəşəriyyət tarixinin ən qəddar müharibələrindən birini aparır.

UAF məktubunda deyilir: “Təhqir və milliyyətə əsaslanan nifrət dolu çıxışlar ksenofobiyanın əsl təzahürüdür – ayrı-seçkiliyin ən ağır formalarından biridir. Buna görə də, bu iş 2026-cı il UEFA Avropa Futzal Çempionatının rəsmi matçı zamanı milli komanda oyunçusunun idmançıya yaraşmayan davranışından daha ciddidir”.

UAF UEFA Nəzarət, Etika və İntizam Orqanından oyunçu Denis Nevedrova və Ermənistan milli komandasına idmançıya yaraşmayan davranışa görə intizam sanksiyaları tətbiq etməsini istəyib.

Xatırladaq ki, 2026-cı il futzal üzrə Avropa çempionatının açılış oyununda Ukrayna millisi gözlənilmədən Ermənistana məğlub olub – 1:2.