Hərbi xidmətə gedən idmançını itiririk - Fərid Mansurov

"Biz hərbi xidmətə gedən perspektivli idmançını faktiki itiririk".

Publika.az xəbər verir ki, bunu Milli Olimpiya Komitəsinin vitse-prezidenti Fərid Mansurov Milli Məclisin Gənclər və idman komitəsinin Gənclər və İdman Nazirliyi, Milli Olimpiya komitəsi və idman federasiyaları ilə təşkil etdiyi görüşdə deyib.

Fərid Mansurov qeyd edib ki, dünya və Avropa çempionatlarında fərdi idman növlərində qalib idmançı Azərbaycan İdman Akademiyasına qəbul olur, lakin digər perspektivli atletlər kənarda qalır:

“Həmin perspektivli idmançılar hərbi xidmətə getdikdə isə biz faktiki olaraq həmin idmançını itirmiş oluruq. Bu da peşəkar idmanda rəqabətin zəifləməsinə, ardıcıl nəsil dəyişiminin pozulmasına gətirib çıxarır. Nəticədə bəzi federasiyalar, xüsusilə nəticə verən aparıcı federasiyalar məcburi legioner idmançılara müraciət edirlər. Bu məsələ qanunvericiliklə müəyyən meyarlar və limitlər çərçivəsində tənzimlənsə, aidiyyəti dövlət qurumları ilə razılaşdırılmış mexanizm qurulsa, daha faydalı nəticə əldə etmək olar”.