Ronaldo karyerasının 968-ci qolunu vurdu

Səudiyyə Ərəbistanının "Əl-Nəsr" klubunun portuqaliyalı hücumçusu Kriştianu Ronaldu karyerasının 968-ci qoluna imza atıb.

Publika.az xəbər verir ki, o, Səudiyyə Ərəbistanı çempionatının 28-ci turunda "Əl-Uxdud"la qarşılaşmanın 15-ci dəqiqəsində Navaf Buşalın ötürməsini qola çevirərək fərqlənib. Hazırda oyunda fasilədir və hesab "Əl-Nəsr"in xeyrinə 1:0-dır.

Milli komandaların oyunları ilə əlaqədar mart ayındakı fasilədən əvvəl Ronaldu Səudiyyə Ərəbistanı çempionatının "Əl-Xalic" və "Neom" klublarına qarşı matçlarını buraxıb. Portuqaliyalı futbolçu İspaniyaya uçaraq budun arxa nahiyəsindən aldığı zədə ilə bağlı müalicə kursu keçib. O, bu zədəni çempionatın 24-cü turunda "Əl-Feyha" ilə oyunda alıb. 41 yaşlı Ronaldu cari mövsümdə "Əl-Nəsr" forması ilə milli çempionatda keçirdiyi 24 oyunda 24 qol vurub.

Fevral ayında Ronaldu klub rəhbərliyindən narazı qaldığı üçün "Əl-Nəsr"in oyunlarını boykot edib. Futbolçu klubun Səudiyyə Ərəbistanı Dövlət İnvestisiya Fondu (PIF) tərəfindən idarə olunma formasından narazılığını bildirib. KİV-in məlumatına görə, Ronaldu fondun digər nəzarətində olan klublarla, xüsusən də "Əl-Hilal"la müqayisədə onun komandasına daha az diqqət və resurs ayırdığını düşünürdü. Sonradan o, komandanın heyətinə geri qayıdıb.

Hüseyn İbadlı