Mbappe Messi və Ronaldo haqqında məşhur stereotipi alt-üst etdi

“Real Madrid” və Fransa millisinin hücumçusu Kilian Mbappe Lionel Messi ilə Kriştiano Ronaldo arasındakı uzun müddətdir davam edən rəqabətdən danışıb.

Fransız futbolçu PSJ-də argentinalı futbolçu ilə birlikdə oynayıb və tez-tez meydanda portuqaliyalı futbolçu ilə yolları kəsişib.

Publika.az xəbər verir ki, Mbappé “Sorare”yə verdiyi müsahibədə deyib:

“Onlar həqiqətən çox fərqlidirlər. Onların mübarizəsi yaxşı idi, çünki qütb əksləridir: Ronaldo sağ ayaqlıdır, Messi sol ayaqlıdır, Ronaldo hündürdür, Messi qısa boyludur, Messi daha zərifdir, Ronaldo daha kobuddur, Ronaldo daha partlayıcıdır, Messi daha çox vizyona və yaradıcılığa malikdir”.

Mbappe həmçinin Ronaldonun hər şeyə əzmkarlıq və zəhmət sayəsində, Messinin isə istedad sayəsində nail olduğu barədə geniş yayılmış stereotipi tənqid edib:

“Bu, futbol oynamayan birinin fikridir. Mən bunu bütün arqumentlərimdə təkrarlayıram. Əgər Ronaldonun istedadının olmadığını və ya Messinin işləmədiyini iddia edirsinizsə, deməli, həyatınızda heç vaxt buts geyinməmisiniz və ya hər gün məşq etməmisiniz. Sadəcə olaraq, hər gün məşq edən birinin necə belə düşünə biləcəyini başa düşmürəm”.