Təhlükə yaxınlaşır: Bu peşə sahibləri işsiz qalacaqlar

"Goldman Sachs" investisiya bankı hesablayıb ki, generativ süni intellektin yayılması iri iqtisadiyyatlarda görülən işlərin beşdə birinin və ya 300 milyon iş yerinin avtomatlaşdırılmasına gətirib çıxara bilər.

Publika.az xəbər verir ki, bu barədə "Financial Times" məlumat yayıb.

Tədqiqat insan əməyini təqlid edən məzmun yarada bilən ChatGPT kimi "generativ" süni intellekt sistemlərinin təsirinə yönəlib. Bu cür sistemlərin daha geniş tətbiqi məhsuldarlıq bumuna səbəb ola bilər ki, nəticədə 10 il ərzində illik qlobal ÜDM-i 7% artıracaq.

Eyni zamanda, texnologiya əsas iqtisadiyyatlarda 300 milyon tam ştatlı işçinin ekvivalentini avtomatlaşdıraraq, əmək bazarına əhəmiyyətli pozuntular gətirəcək. İşsiz qalma riski ilə ən çox üzləşənlər hüquqşünaslar və inzibati heyət olacaq.

Tədqiqatçılar hesablayıblar ki, ABŞ və Avropada iş yerlərinin təxminən üçdə ikisi süni intellektin köməyi ilə müəyyən dərəcədə avtomatlaşdırılmaya məruz qalır.

Tədqiqat göstərir ki, süni intellekt kiçik bizneslər üçün vergi bəyannamələrinin təqdim edilməsi, mürəkkəb sığorta iddialarının qiymətləndirilməsi və ya hadisə yerində araşdırmanın nəticələrinin sənədləşdirilməsi kimi vəzifələri yerinə yetirmək qabiliyyətinə malikdir.

Ayşən Rəhim