Sevgi bəxşişdir
Bizi izləyin

Köşə

Sevgi bəxşişdir

İnsan cəngəllikdə yaşamır deyə, həyatı pambıq buludlar üstündə keçmir. Orqanları düşüncənin quyruğuna düzsək, bunun dovşanını da, ayısını da, canavarından çaqqalına, maralından pələnginə hamısını dərisindən tutmuş iliyinədək gəzdirdiyimizə heyrətlənərik.

Vəhşi təbiət konstitusiyasını özü yazır. Heyvanlar aləminə nə qədər ədalətli desək də, içimizdəki vəhşini oyadan çox məqamlar var.

Məsələn, maral ömrünü pələngə yem etməməkdən ötrü sübhün ən şirin saatında yuxusuna haram qatıb, yarımayıq gücü ilə qaçır. Pələng maralın planından hali olduğu üçün gecədən zəngli saatını maralın ayaq sürətinə qoşub yatır.

Taa ki, bir gün maral canını pələngin dişinə tapşırana qədər qaçdı-tutdu rutini davam edir.

Həyat kimi...

Ömür boyu 3-5 qəpik uğrunda pələngdən qaçmağımız azmış kimi, günəşlə təmasımızı minimuma endirən gizli kameralar bəs etmirmiş kimi bir də içimizi gəmirən vicdanla əlləşirik.

Məsələn, mənim şüurum hər gün mədəmdən tez oyanıb meşənin ən səssiz küncünə qaçır. Bir neçə dəqiqə fərqlə mədəm oyanıb zehnimi də, bonus olaraq əlinə keçən, gözünə görünən ən dadlı yeməkləri çeynəmək ehtirasına bürünür.

Murakami də deyir ki, çəkisini stabil saxlamağa can atan köklüyə meyilli insanlar həyatda daha çox uğur qazanır.

Niyə?

Çünki ömrü artıq çəkidən tutmuş nəfsinə yenilmək istəmədiyi, digər məsələlərin həllinə qədər bütün vacib detallara yönəlir.

Əslində, hər şeyin sonunun olduğunu dərk etmək sonsuz xoşbəxtlikdir. Əslində, ölümlə əl-ələ yaşamaq həyatımızı asanlaşdırır.

Və bu harmoniyanın içində hər iki dünyada diri qalmaq, yaşamaq, yaşamağı bacarmaq gərəkdir. Doymaq üçün özünə qurban seçmədən, paralel məqamda da özünü düşmənin ağzına saqqız etmədən, əzmədən, yıxmadan, dağıtmadan, amma özünə də zərər vermədən qızıl ortanı seçmək.

Bunun yalnız bir yolu var - sağlam sevgi. Bəlkə də bu nəticəyə varmaq uzun zaman alacaq. Hətta bəziləri ömrünün sonunadək duyğularının davasını dinləyəcək. Amma sevginin ruhu xəstədirsə, ömrünüz qaçdı-tutdu oynamaqla keçəcək.

Pələngə maraldan, dovşana yalquzaqdan, mərhəmətə çirkabdan dost olmur. Sevgi bəxşişdir. Kim deyir ki, qarşılıq gözləmədən özünü tükədəcəksən?

Mədəsinə, ürəyinə, sinirlərinə düşmən yox, dost olacaqsansa, o balansı qarşılıqlı qoruyacaqsansa, sevirsən.

Ürəyinizə çoxlu məhəbbət toxumları, mədənizə sonsuz rəngli kəpənəklər...

Oxumağa davam et
Reklam
Reklam

Gündəm