Avropa Gününün təsis edilməsi ilə bağlı təklif

Ukrayna Prezidenti Volodimir Zelenski mayın 8-nin Anım və İkinci Dünya müharibəsində nasizm üzərində Qələbə Günü və mayın 9-nun Avropa Günü kimi təsis edilməsini təklif edən qanun layihəsini Ukrayna Ali Radasına təqdim edib.

Publika.az xəbər verir ki, Zelenski bununla bağlı sosial media hesabında məlumat verib.

“Biz heç kimə imkan verməyəcəyik ki, II Dünya müharibəsindəki qələbədə ukraynalıların rolunu, xalqımızı, demək olar ki, hər bir ailəmizdə xatirəsini saxladığımız o nəslin rolunu silsin. Biz anti-Hitler koalisiyasına daxil olan xalqların ümumi qələbəsinin mənimsənilməsinə imkan verməyəcəyik”, - deyə Zelenski bildirib.

Dövlət başçısı əlavə edib ki, hazırda oxşar bəlaya qarşı birgə müqavimət göstərilir:

“Şər, təəssüf ki, geri qayıtdı. Necə ki, o vaxt pislik şəhərlərimizə, kəndlərimizə axışdı, indi də elə gəlir. O vaxt xalqımızı öldürdüyü kimi, indi də elə edir. Baxmayaraq ki, hazırda təcavüzkar fərqlidir, amma məqsəd eynidir - əsarət və məhv”.

Həmçinin, Ukrayna Prezidenti hər il mayın 9-da Ukraynada Qələbə Gününün deyil, Avropa Gününün qeyd edilməsi haqqında fərman imzalayıb.