Abxaziyada ruslara hücum: Moskva 7 nəfəri tələb edir - Biri deputatdır

Soçi məhkəməsi ruslara qarşı silahlı soyğunçuluqda şübhəli bilinən yeddi Abxaziya vətəndaşını qiyabi olaraq həbs edib.

Publika.az xəbər verir ki, "Vzglyad" qəzetinin məlumatına görə, onların arasında respublika parlamentinin hazırkı üzvü Kan Kvarçia da var.

İctimaiyyətə açıq məlumatlara görə, iş soyğunçuluq, hücum və mənimsəmə ilə bağlıdır. Prezident yanında İnsan Hüquqları Şurasının üzvü Aleksandr İonov şübhəlilərin istintaqdan gizləndiyini bildirib.

Məhkəmə həbs qətimkan tədbirinin seçilməsi ilə bağlı vəsatəti təmin edib. Qiyabi həbs olunanlar siyahısında Kan Kvarçiya ilə yanaşı, Kan Dumaa, Azamat Xalbata, Efrem Kvarçiya və David Nakopia da var. Onların hamısı Abxaziyada Rusiya vətəndaşlarına hücumda ittiham olunurlar.

İonov qeyd etdi ki, parlament toxunulmazlığı şəxsləri cinayət məsuliyyətindən azad etmir. O bildirib ki, beynəlxalq təcrübə qanunvericilik statusuna malik şəxslərin ya toxunulmazlığı ləğv edildikdən sonra, ya da dövlətlərarası müqavilələr əsasında təqib olunmasını nəzərdə tutur.

O, həmçinin İnterpol prosedurları və BMT standartları da daxil olmaqla beynəlxalq axtarış mexanizmlərinin mövcudluğuna işarə edib.

İonov hesab edir ki, Abxaziya hakimiyyəti şübhəlilərin həbsini və ekstradisiyasını asanlaşdırmalıdır.

İnsan Hüquqları Şurası üzvünün sözlərinə görə, məsələnin təxirə salınması ikitərəfli münasibətlərə təsir göstərə bilər. O, soyğunçuluq da daxil olmaqla, ağır cinayətlərin təqsirləndirilən şəxsin statusundan asılı olmayaraq hüquqi qiymətləndirilməsinin tələb olunduğunu vurğulayıb.

Tural