Belçika səfiri Rusiya XİN-ə çağırıldı

Belçikanın Rusiyadakı səfiri Mişel Jerebtsoff Rusiya Federasiyasının Xarici İşlər Nazirliyinə çağırılıb.

Publika.az xəbər verir ki, bu barədə Rusiya xarici siyasət idarəsinin saytında bildirilir.

Rusiya diplomatiya idarəsindən verilen məlumata görə, diplomat qarşısında Mosvanın mövqeyi bəyan edilib; Moskva Belçikanın hərbi-siyasi rəhbərliyi tərəfindən tez-tez səsləndirilən ittihamları qətiyyətlə rədd edir. Söhbət Rusiyadan Belçika və Avropaya yönələn, artmaqda olan hibrid, təxribat xarakterli və birbaşa hərbi təhdidlər barədə iddialardan gedir. Rusiya tərəfi bu bəyanatları “heç nə ilə əsaslandırılmayan” kimi xarakterizə edib və onları krallıq hakimiyyətinin anti-Rusiya ritorikası ilə əlaqələndirib.

“Belçika hakimiyyətinin ayrı-ayrı nümayəndələrinin Rusiyanı məqsədyönlü şəkildə düşmən kimi qələmə verən açıq-aşkar təcavüzkar çıxışları gərginliyin daha da artmasına və onların alovlandırdığı qarşıdurmanın nəzarətdən çıxması riskinə rəvac verir”, - məlumatda qeyd olunub.

Buna qədər Belçikanın müdafiə naziri Teo Franken bəyan etmişdi ki, Rusiya Qərb cəbhəsini açır və ictimai rəyi Kiyevə qarşı çevirməyə çalışaraq Ukraynanın müttəfiqlərinə təzyiq göstərir.

O hesab edir ki, gərginlik həm döyüş meydanında, həm də Avropada artacaq. Onun sözlərinə görə, Avropa Soyuq müharibə dövründən bəri Moskvadan “belə təcavüzkar ton” eşitməmişdi.

Hüseyn İbadlı