ABŞ-a ŞOK: Suriyadakı yeganə müttəfiqi Dəməşqin nəzarətinə keçir

“Suriya Demokratik Gücləri”nin (əsas hissəsi YPG terror təşkilatının döyüşçülərindən ibarətdir –red.) döyüşçüləri Suriya ordusunun tərkibinə girə bilərlər.

Publika.az xəbər verir ki, bu haqda hökumətdəki mənbələrə istinadən “Al-Akhbar” qəzeti yazıb.

Bildirilir ki, Suriya hakimiyyəti “Suriya Demokratik Gücləri”ni dağıtmaq və qruplaşmanı ordu və güc strukturlarının tərkibinə daxil etməyi planlaşdırır. Bundan başqa, Dəməşq daha əvvəl “Suriya Demokratik Gücləri”nin nəzarətində olan regionlarda dövlət orqanlarının işini bərpa etmək istəyir.

Qeyd edək ki, Türkiyə oktyabrın 9-da Suriyanın şimalında "Sülh çeşməsi" antiterror əməliyyatına başlayıb. Oktyabrın 17-də isə YPG terrorçularının bölgədən çəkilməsini nəzərdə tutan Türkiyə-ABŞ razılaşması əldə edilib. Razılaşmaya əsasən, əməliyyat terrorçuların bölgədən çəkilməsi üçün 120 saat müddətində dayandırılmışdı.

Oktyabrın 22-də isə Rəcəb Tayyib Ərdoğanın rusiyalı həmkarı Vladimir Putinlə Soçidə keçirdiyi 6 saatlıq görüşündə Suriyanın şimalında yaradılacaq təhlükəsiz zona ilə bağlı razılıq əldə edilib. Hər iki razılaşma YPG-nin Suriyanın şimalından çıxarılmasını nəzərdə tuturdu.

Oktyabr 29-da Rusiya Müdafiə Nazirliyindən bildirilib ki, YPG bölgəni nəzərdə tutulmuş müddətdən daha tez tərk edib. Eyni bəyanatı həmçinin, “Suriya Demokratik Gücləri” verib. Qeyd edilirdi ki, qruplaşma əvvəl Rusiyaya öz etirazlarını ifadə edirdilər, ancaq sonda sülh təşəbbüsü ilə razılaşmalı olublar.

Qeyd edək ki, “Suriya Demokratik Gücləri” ABŞ-ın Suriyadakı yeganə müttəfiqi sayılır.