Əhməd Əl Şaraa ölkədə hərtərəfli atəşkəs elan etdi

Suriyanın keçid prezidenti Əhməd Əl Şaraa ölkədə hərtərəfli atəşkəs elan edib.

Publika.az SANA agentliyinə istinadla xəbər verir ki, bu barədə Suriya Prezident Administrasiyasının bəyanatında deyilir.

“Ölkənin hazırda yaşadığı xüsusi şəraiti nəzərə alaraq, qan tökülməsinə son qoymaq, Suriya ərazisinin birliyini və onun əhalisinin təhlükəsizliyini qorumaq üçün Suriya Ərəb Respublikasının rəhbərliyi dərhal və hərtərəfli atəşkəs elan edir”, - bəyanatda deyilir.

Suriya rəhbərliyi istisnasız olaraq bütün tərəfləri bu qərara tam əməl etməyə, bütün bölgələrdə bütün hərbi əməliyyatları dərhal dayandırmağa, mülki insanları qorumağa və humanitar yardımın maneəsiz çatdırılmasını təmin etməyə çağırıb.

Hakimiyyət xəbərdarlıq edib ki, atəşkəs rejiminin pozulması ölkənin suverenliyinin pozulması kimi qiymətləndiriləcək və hüquqi tədbirlərlə nəticələnəcək.

Xatırladaq ki, iyulun 13-də Suriya silahlı qruplarının Əs-Suveyda əyalətində bir sıra druzların (İsrail hökumətinin dəstəklədiyi etnik qruplar) yaşayış məntəqələrinə hücumu, nəticədə əyaləti Dəməşqlə birləşdirən avtomobil yolunun da bağlanması barədə məlumat yayılmışdı. Mülki əhalini qorumaq üçün druz özünümüdafiə dəstələri silahlı dəstələrlə döyüşə başlayıblar.

Druzlara dəstək olaraq İsrail Müdafiə Qüvvələri (İDF) iyulun 16-da Dəməşqdəki Suriya Baş Qərargahının giriş qapısına zərbələr endirib. Suriya ilə gərginlik fonunda İDF iki diviziyanı Colan təpələrinə köçürməyə hazır olduğunu da açıqlayıb.

İyulun 19-da ABŞ-ın Türkiyədəki səfiri və ABŞ-ın Suriya üzrə xüsusi nümayəndəsi Tom Barak İsrailin baş naziri Binyamin Netanyahu və Suriyanın müvəqqəti prezidenti Əhməd Əl Şaraa atəşkəs barədə razılığa gəldiklərini açıqlayıb.

Akqabay