BMT ilk dəfə elan etdi: Qəzzada vəziyyət kritikdir

BMT agentlikləri və humanitar təşkilatın birgə bəyanatına əsasən, Qəzza zolağında ilk dəfə olaraq fəlakətli aclıq vəziyyəti elan edilib.

Publika.az xəbər verir ki, Birləşmiş Millətlər Təşkilatının Ərzaq və Kənd Təsərrüfatı Təşkilatının bəyanatında deyilir: “Qəzza zolağında yarım milyondan çox insan geniş yayılmış qida çatışmazlığı, yoxsulluq və qarşısı alına bilən ölümlərlə xarakterizə olunan aclıq vəziyyətindədir”.

BMT tərəfindən qəbul edilmiş İnteqrasiya edilmiş Qida Təhlükəsizliyi Faza Təsnifatı (IPC) ərzaq təhlükəsizliyinin 5 mərhələsini ayırır, burada 3-dən 5-ə qədər səviyyələr kəskin ərzaq çatışmazlığına uyğun gəlir. Son, beşinci mərhələ fəlakətli aclıq deməkdir.

Sentyabrın sonuna qədər Qəzza zolağında 640 000-dən çox insanın Beynəlxalq Qida Təhlükəsizliyi Təsnifatına əsasən 5-ci faza kimi təsnif edilən qida təhlükəsizliyinin fəlakətli səviyyələri ilə üzləşdiyi təxmin edilir. Ərazidə daha 1,14 milyon insan fövqəladə vəziyyətdə (IPC Faza 4), daha 396 000 nəfər böhran vəziyyətində olacaq (Faza 3).

Qəzzada vəziyyətin aclıqdan ölənlərin sayının artması və qida istehlakının kəskin azalması ilə xarakterizə olunduğu vurğulanır.

Hesabatda "Yüz minlərlə insan günlərlə yeməksiz qalır" deyilir.

Qəzzanın əkin sahələrinin demək olar ki, 98%-i dağıdılıb və ya əlçatmaz vəziyyətdə olub və ərzaq istehsalı iflic vəziyyətinə düşüb. Bundan əlavə, humanitar yardımlar son dərəcə məhduddur, yanacaq, su və dərmanlar kəskin qıtlıq içərisindədir.

Uşaqlar arasında kəskin qida çatışmazlığının artması xüsusi narahatlıq doğurur. Təkcə iyul ayında uşaqlar arasında 12 000-dən çox kəskin qidalanma halı qeydə alınıb ki, bu da indiyədək qeydə alınan ən yüksək göstəricidir. Bunlardan demək olar ki, dörddə biri ölümcül təhlükə yaradan ağır formadan əziyyət çəkir.

BMT-nin aclıq vəziyyəti ilə bağlı qiymətləndirməsi o deməkdir ki, müəyyən bir ərazidə üç kritik həddə çatılıb: həddindən artıq qida çatışmazlığı, kəskin qidalanma və aclıqdan ölüm halları. Son təhlillər bu meyarların qeydə alındığını təsdiqləyir.