ABŞ Yaxın Şərqə əlavə qırıcılar yerləşdirdi: Hücum hər an başlaya bilər

ABŞ hava qüvvələrini gücləndirmək üçün Yaxın Şərqə əlavə 18 ədəd beşinci nəsil "F-35A Lightning II" qırıcı təyyarəsi yerləşdirib.

Publika.az xəbər verir ki, bu barədə “Itamilradar” agentliyi məlumat yayıb.

Bildirilir ki, qırıcı təyyarələr Böyük Britaniyadakı Leyknhit Hərbi Hava Qüvvələri Bazasından havaya qalxıb. Onların Yaxın Şərqə uçuşuna "KC-135 Stratotanker" tankerləri dəstək verib.

Bu, Amerika döyüş təyyarələrinin regiona eyni vaxtda ən böyük yerləşdirilmələrindən biridir. Onun miqyası İranla artan gərginlik fonunda ABŞ-ın Yaxın Şərqdəki hərbi potensialının kəskin artmasını nümayiş etdirir.

Bununla da ABŞ-ın Yaxın Şərqdə 30 "F-35A" qırıcısı, iki "F-15E Strike Eagle" qırıcı eskadrilyası (24 təyyarə) və bir "A-10 Thunderbolt II" hücum təyyarəsi eskadrilyası (12 təyyarə) var. Nəticə etibari ilə Amerika döyüş təyyarələrinin bölgədəki ümumi sayı təxminən 66-ya çatır.

Bundan əlavə, İran yaxınlığında Ərəbistan dənizində yerləşən "USS Abraham Linkoln" təyyarədaşıyan gəmisində "F-35C Lightning II" qırıcılarından ibarət eskadrilya və "F/A-18E/F Super Hornets"dən ibarət üç eskadrilya var. Hər eskadrilya təxminən 12 təyyarədən ibarətdir.

Adəm