10 ayda 638 nəfər öldü, 1721 nəfər yaralandı

Bu ilin 10 ayı ərzində Azərbaycanda 1677 yol-nəqliyyat hadisəsi qeydə alınıb.

Publika.az Baş Dövlət Yol Polisi İdarəsinin saytına istinadən xəbər verir ki, yol-nəqliyyat hadisələri nəticəsində 638 nəfər həlak olub, 1721 nəfər yaralanıb. 2015-ci ilin müvafiq dövrü ilə müqayisədə qəzaların sayı 169 fakt (9,2%), həlak olanların sayı 103 nəfər (13,9%), yaralananların sayı 184 nəfər (9,7%) azalıb.

Bakı ərazisində 561 yol-nəqliyyat hadisəsi qeydə alınıb, bunların nəticəsində 158 nəfər həlak olub, 579 nəfər yaralanıb. 2015-ci illə müqayisədə paytaxtda yol-nəqliyyat hadisələrinin, həlak olanların və yaralananların sayı uyğun olaraq 107 fakt (16%), 37 nəfər (19%), 139 nəfər (19,4 %) azalıb.

Respublika üzrə qeydə alınmış yol-nəqliyyat hadisələrinin 38,9%-i (654 hadisə, 250 ölüm, 708 yaralı) ötmə və qarşıdan gələn nəqliyyatın yoluna çıxma, 23,2%-i (390 hadisə, 179 ölüm, 340 yaralı) nəqliyyat vasitələrinin yüksək sürətlə idarə olunması, 12,9%-i (217 hadisə, 49 ölüm, 256 yaralı) yolayrıclarını keçmə qaydalarının pozulması, 1,9%-i (33 hadisə, 15 ölüm, 31 yaralı) nəqliyyat vasitələrinin sərxoş vəziyyətdə idarə olunması səbəbindən baş verib.

Yol-nəqliyyat hadisələrinin 41,8%-ni (702) piyadaların vurulması təşkil edib, nəticədə 257 piyada həlak olub, 516-ı yaralanıb. Respublika üzrə qeydə alınmış yol-nəqliyyat hadisəsi nəticəsində 46 nəfər uşaq və yeniyetmə həlak olub, 165 nəfər yaralanıb. 2015-ci ilin müvafiq dövrü ilə müqayisədə azyaşlıların iştirakı ilə baş vermiş yol-nəqliyyat hadisələrində həlak olanların sayı 14, yaralananların sayı isə 8 nəfər azalıb.