Millət vəkilləri TürkPA-nın iclaslarında iştirak edəcəklər

Nida.az
11 Aprel 2014 22:28
893 Baxış

Milli Məclisin Mədəniyyət komitəsinin sədri Nizami Cəfərov, deputatlar Əhliman Əmiraslanov və Sədaqət Vəliyeva Türkdilli Ölkələrin Parlament Assambleyası (TürkPA) komissiyalarının iclaslarında iştirak etmək üçün aprelin 14-dən 17-dək Qırğızıstanın paytaxtı Bişkekdə səfərdə olacaqlar.

Milli Məclisin mətbuat xidmətindən Publika.az-a verilən məlumata görə, qurumun Beynəlxalq əlaqələr komissiyasında "Türkdilli ölkələrin beynəlxalq təşkilatlar çərçivəsində qarşılıqlı əlaqələri" mövzusunda məruzə dinləniləcək, tövsiyələr veriləcək. Məruzəni Milli Məclisin deputatı, komissiyanın sədri Ə.Əmiraslanov təqdim edəcək.

Millət vəkilləri N.Cəfərov və S.Vəliyeva isə təşkilatın Sosial, mədəni və humanitar məsələlər komissiyasının iclasında "Türk dili günü" mövzusuna həsr olunmuş müzakirələrə qatılacaqlar. Toplantıda türk dilinin tarixi, inkişafı, tədrisi və tədqiqi ilə bağlı fikir mübadiləsi aparılacaq.

Səfər çərçivəsində, həmçinin ekspertlərin iştirakı ilə "Elm, təhsil və mədəniyyət sahəsində əməkdaşlıq" mövzusunda "dəyirmi masa" keçiriləcək.