Beynəlxalq təşkilatlar bu məsələyə diqqət yetirməlidir - Deputat

“Dünyada anti-terror koalisiyası var və terrorla hərtərəfli, amansız mübarizə gedir. ASALA öz terror hərəkətlərinə yenidən başlayacağı barədə bəyanat verirsə, onun yerləşdiyi ölkələr həmin bəyanata reaksiya verməli və bütün beynəlxalq təşkilatların da diqqətini bu məsələ cəlb etməlidir”.

Bu fikirləri Publika.az-a açıqlamasında Milli Məclisin deputatı Asim Mollazadə deyib.

Deputatın sözlərinə görə, terror insanlığa qarşı cinayətdir və bu cinayətlərlə bütün dövlətlər, beynəlxalq təşkilatlar öz imkanlarını səfərbər edərək amansız mübarizə aparmalıdır: “Terrora dünyada yer yoxdur. Azərbaycan da öz növbəsində hər zaman beynəlxalq qüvvələrlə birgə terrorla mübarizə aparıb. Təbii ki, Azərbaycan üçün terror təhlükəsi yaranarsa, mütləq özünü qoruyacaq və bununla bağlı bütün zəruri addımları atacaq”.

A.Mollazadə vurğulayıb ki, ASALA terror təşkilatının dirilməsi ilə əlaqədar bəyanat verməsi, hansı ölkədə bu təşkilatın nümayəndələrinin yerləşməsi də ciddi araşdırılmalıdır.