Azərbaycan bununla bağlı müzakirə aparmayacaq - Deputat

"Azərbaycan və Ermənistan rəhbərlərinin Brüssel görüşündə sərhədlərin delimitasiyası ilə əlaqədar işçi qrupun və birgə komissiyanın yaradılmasıyla bağlı razılığa gəlinib. Ermənistanın bununla bağlı nə dərəcədə səmimi olduğunu isə gələcək proseslər göstərəcək".

Bunu Publika.az-a açıqlamasında Milli Məclisin deputatı Aydın Mirzəzadə deyib.

Millət vəkili bildirib ki, Azərbaycan ərazisində Qarabağ adlı inzibatı-ərazi vahidi yoxdur və o bölgənin status məsələsi artıq gündəmdə durmur:

"Azərbaycan heç bir zaman oranın xüsusi statusu ilə bağlı müzakirə aparmayacaq. Bu gün Rusiya sülhməramlılarının müvəqqəti nəzarəti altında yaşayan ermənilər isə Azərbaycan vətəndaşlarıdır və onların da hüquqları bütün vətəndaşlarımızın hüquqları kimi daima qorunacaq. Azərbaycanın prinsipial mövqeyi hər iki ölkənin bir-birinin ərazi bütövlüyünü tanıması və SSRİ dövrünün xəritələrinə əsasən, iki respublika arasında dövlət sərhədlərinə hörmət edilməsidir. Azərbaycan Ermənistandan ölkəmizin daxili işlərinə qarışmasına son qoymasını da tələb edir".