Qubad İbadoğlu hərəkətə keçdi: Müsavatın rayon təşkilatları buraxılır

Bu gün Azərbaycan Demokratiya və Rifah (ADR) hərəkatının Təşkilat Komitəsinin iclası keçirilib.

Bu barədə Publika.az-a ADR Təşkilat Komitəsinin üzvü Səxavət Əlisoy məlumat verib.

Onun sözlərinə görə, iclasda fevralın 15-nə kimi ADR-in 30 rayonda təşəbbüs qrupunun yaradılması qərara alınıb: “Sabah 4 rayonda təşəbbüs qrupu yaradılacaq. Fevralın 21-də keçiriləcək ADR-in təsis konfransının texniki məsələləri müzakirə olundu. Təsis konfransına kimlərin dəvət olunması məsələsi gələn toplantıda müzakirə olunacaq”.

S. Əlisoy bildirib ki, Qubad İbadoğlu Müsavatdan çıxarılandan sonra partiyanın rayon təşkilatları arasında kütləvi istefa vermək istəyənlər var.

“Biz toplantıda Qubad bəyin partiyadan çıxarılmasını müzakirə etdik. Bu haqda Qubad bəy ümumi açıqlama yayacaq. Digər məsələ rayon təşkilatları ilə bağlıdır. Kəndlərdə, rayonlarda Qubad bəyə qarşı qərara etiraz olaraq istefa vermək istəyənlər var. Xüsusilə rayon təşkilatlarının buraxılması məsələsi gündəmə gəlib. Qubad bəy fevralın 9-da ABŞ-a səfər edəcək. O qayıdandan sonra rayon təşkilatlarının necə hərəkət etməsi haqda qərar qəbul olunacaq”, - deyə o bildirib.

Asif Nərimanlı