Vidadi İsgəndərliyə sığınacaq verən Fransa beynəlxalq hüquqa qarşı

Özünü “siyasi mühacir” adlandıran Vidadi İsgəndərlinin Fransada – qanunun şah olduğu deyilən bu ölkədə oturub Azərbaycana qarşı ağzı köpüklənə-köpüklənə söyüşlə söyməsinə kifayət qədər şərait yaradılıb. Belə görünür ki, terrora çağırış edən, zorakılığı təbliğ edən Vidadi İsgəndərlinin bu davranışı nə qədər beynəlxalq hüquqa ziddirsə, onu torpağında saxlayan və terror əsdirməsinə şərait yaradan Fransa da eyni məsuliyyəti daşıyır.

Çünki insanları zorakılığa, terrora çağırmaq, qeyri-konstitusion davranışa sövq etmək suveren xalqın iradəsinə, demokratiya normalarına, habelə beynəlxalq qanunvericiliyə ziddir. Buna rəğmən, şübhəli şəkildə Fransada “siyasi sığınacaq” almış, bu ölkədə yaşayaraq Azərbaycanın dövlət institutlarını və simvollarını ən eybəcər formada təhqir edən, xalqı konstitusion quruluşu devirməyə çağıran Vidadi İsgəndərlinin qanunsuz və cinayətkar fəaliyyətinə hər cür şərait yaradılması diqqət çəkir.

Vidadi İsgəndərli Azərbaycanda olarkən heç bir siyasi fəaliyyət göstərməyib və buna görə də “siyasi mühacir” sayıla bilməz. O, vaxtilə işlədiyi dövlət orqanından yol verdiyi ciddi nöqsanlara görə çıxarıldıqdan sonra qisas almaq məqsədilə Azərbaycanda pozuculuq fəaliyyəti göstərib, sosial şəbəkələrdə yerləşdirdiyi videolarda iğtişaşlar törədəcəyini, hakimiyyəti devirəcəyini dəfələrlə bəyan edib.

Bu fakt həmin adamın Azərbaycan xalqının iradəsinə hörmətsizliyini və qanunazidd əməllər törətdiyini aydın şəkildə göstərməklə yanaşı, həm də onun psixoloji cəhətdən adekvat olmadığını anlamaq üçün kifayətdir.

Bu, Azərbaycan dövlətinə və millətinə qarşı açıq-aşkar təxribat və hörmətsizlikdir. Belə bir şəxsə Fransada sığınacaq verilməsi, onun fəaliyyətinə hər cürə şərait yaradılması Fransa hakimiyyətinin Azərbaycana münasibətdə səmimiliyini şübhə altına qoyur.

Fransa dövləti, bu ölkənin aidiyyəti orqanlarını Vidadi İsgəndərlinin tetor və zorakılıq çağırışlarına diqqət yetirməli və müvafiq tədbirlər görməlidirlər. Əks təqdirdə, bu ölkənin özü də beytnəlxalq hüquq qarşısında məsuliyyət altına düşür.

Publika.az