Həmin qanunlar hazırkı yeniliklərə cavab vermirdi - Şərh

“Media haqqında” qanunun qəbul edilməsi çox vacib bir məsələdir. Çünki müasir dövrdə müxtəlif media formatları mövcuddur. Ümumiyyətlə, kütləvi informasiya vasitələrinin fəaliyyətini təsdiqləyən qanunların qəbul edilməsi təbii haldır.

Bunu Publika.az-a açıqlamasında Bakı Dövlət Universitetinin Jurnalistika fakültəsinin dekanı, filologiya elmləri doktoru Vüqar Zifəroğlu deyib.

Ekspert qeyd edib ki, əvvəlki 2 qanun müasir dövrün tələblərinə və hazırkı yeniliklərə cavab vermirdi: “Azərbaycanda kütləvi informasiya vasitələrinin fəaliyyətini təsdiqləyən əsas 2 qanun var idi. Bunlardan biri kütləvi informasiya vasitələri haqqında, digəri isə radio və televiziya yayımı haqqında olan qanunlar idi. Həmin qanunlar hazırkı yeniliklər qarşısında aciz qalırdı. Elektronik innovasiya vasitələri qanununa 80-ə qədər düzəliş edilməsi bunun əyani sübutudur. Yəni bu mənada yeni qanunun qəbul edilməsinə ehtiyac var idi”.

V.Zifəroğlu vurğulayıb ki, “Media haqqında” qanun dövlət-media və cəmiyyət-media münasibətlərini tənzimləyən normativ sənəddir: “ “Media haqqında” qanuna nəzər yetirsək, üzərində kifayət qədər zəhmət olan bir layihə ilə tanış oluruq. Burada audio-vizual media formatı və onlayn media ilə bağlı müəyyən qaydalar öz əksini tapır. Təbii ki, burada müxtəlif parametrlərdən olan maraqlar nəzərə alınmalıdır. Medianın dövlət və cəmiyyətlə münasibətləri bu qanun vasitəsilə tənzimlənməlidir. Bu qanun haqqında müxtəlif və maraqlı təkliflər var. Müzakirələrdə bu təkliflər nəzərə alınıb və bunun ətrafında fikir mübadiləsi aparılıb. Media haqqında qəbul edilən qanunlar beynəlxalq prinsiplərə uyğundur. Hər hansısa bir qanun qəbul edildiyi zaman bunun alternativləri nəzərdən keçirilir. Yəni beynəlxalq təcrübə öyrənilir və bununla bağlı müqayisələr aparılır. Bu qanun üzərində işləyən hüquqşünaslarımız da bu müqayisəni aparıblar”.

Rahib Ələsgərov