Azərbaycan liderindən Türkiyəyə QARDAŞ DƏSTƏYİ

Ötən il iyulun 15-də qardaş Türkiyədə dövlət çevrilişinə cəhdin qarşısının alınmasından bir il ötür. Tarixə “15 iyul hadisələri” olaraq keçən bu qanlı çevriliş cəhdi zamanı Azərbaycan dövləti qardaş ölkənin yanında sona qədər dayandı. Türkiyə xalqı xüsusilə Azərbaycan Prezidenti İlham Əliyevin göstərdiyi dəstəyi unutmur.

“Dövlətçiliyə qarşı yönəlmiş istənilən cəhd iflasa məhkumdur”

Azərbaycan lideri 15 iyul hadisələrinin ildönümündə də Türkiyə xalqına dəstəyini bir daha ifadə etdi.

“İyulun 15-də Türkiyə Cümhuriyyətində qanuni hakimiyyəti zorakılıqla devirmək cəhdinin qarşısının alınmasının bir ili tamam olur. O gecə yaşanan qanlı hadisələr, ölkənin Konstitusiya quruluşunu fədakarlıqla qoruyan türk xalqının mətinliyi və insanların öz canını qurban verməsi Azərbaycanda əsl qəhrəmanlıq nümunəsi kimi böyük ehtiramla xatırlanır. Həmin gün demokratiya və qanunçuluğun müdafiəsinə qalxmış milyonlarla vətəndaş bir daha sübut etdi ki, xalqın iradəsinə heç kim qalib gələ bilməz və dövlətçiliyə qarşı yönəlmiş istənilən cəhd iflasa məhkumdur. Hadisə haqqında xəbər tutan kimi mən dərhal Türkiyənin legitim hakimiyyətinə öz dəstəyimi ifadə edərək, ölkənin Konstitusiya quruluşuna qəsd edən Vətən xainlərini birmənalı şəkildə pislədim və bununla bağlı Azərbaycanın hökumət üzvlərinə müvafiq tapşırıqlarımı verdim. Əminəm ki, dövlətçiliyi, demokratik dəyərləri və Sizin rəhbərliyinizlə cəmiyyət həyatının bütün sahələrində əldə olunmuş uğurları yaşatmaq üçün sarsılmaz iradə nümayiş etdirən vətəndaşların rəşadəti və şəhidlərin unudulmaz xatirəsi hamımızın qəlbində daim yaşayacaqdır. Sizin liderliyiniz, türk xalqının həmrəyliyi və qətiyyəti sayəsində xain niyyətlərin qarşısına keçilməz sipər çəkildi, Türkiyə dövləti böyük təhlükələrdən xilas oldu. Ötən dövrdə Siz əhalini səfərbər etməklə, ölkənizin inkişafı və dünya dövlətləri sırasında nüfuzunun güclənməsi istiqamətində böyük işlər gördünüz, şəxsi məqsədlərini xalqın iradəsindən üstün tutan anti-milli qüvvələrə qalib gəldiniz. Bütün bunlar, qardaş Türkiyə vətəndaşları kimi, bizi də ürəkdən sevindirir. Bu günlərdə İstanbulda baş tutmuş Dünya Neft Sammitində Sizinlə keçirdiyimiz görüşü məmnuniyyətlə xatırlayır, apardığımız müzakirələrin gələcək əlaqələrimizin daha da möhkəmlənməsinə ciddi təsir göstərəcəyinə inandığımı bildirirəm”, - deyə Prezidenti İlham Əliyev Türkiyə prezidenti Rəcəb Tayyip Ərdoğana ünvanlandığı məktubda bildirir.

15 iyul şəhidlərinin ruhuna Allahdan rəhmət diləyən Azərbaycan lideri “qardaş türk xalqına dözüm arzulayaraq, bütün taleyüklü məsələlərdə Sizinlə həmrəy olduğumu ifadə edirəm” deyə əlavə edir və bununla ümummilli lider Heydər Əliyevin “Bir millət iki dövlət” prinsipinin Azərbaycan və Türkiyə üçün vaz keçilməz qardaşlıq nümunəsi olduğunu nümayiş etdirir.

“Cənab Prezident səhərə kimi o gecənin ciddi sarsıntılarını yaşadı”

15 iyul hadisələri ilə bağlı Türkiyənin Bakıdakı səfirliyində keçirilən mərasimdə Prezident İlham Əliyevin müraciətini oxuyan Prezidentin köməkçisi Əli Həsənovun sözləri həmin hadisələr vaxtı Azərbaycan rəhbərliyinin qardaş Türkiyəyə göstərdiyi dəstək bir daha öz əksini tapır.

“Milli barış, milli həmrəylik getdikcə möhkəmlənir. Azərbaycanda iyulun 15-i gecəsi məsul şəxslərin heç biri səhərədək yatmadı. Şəxsən mən Azərbaycan Prezidentinin köməkçisi kimi şahidəm ki, cənab Prezident səhərə kimi o gecənin ciddi sarsıntılarını yaşadı. İlk olaraq səhər açılar-açılmaz bu məsələyə öz münasibətini bildirdi, xain cəhdləri pislədi və qiymətini verdi. Ötən müddətdə Azərbaycan Türkiyədə ictimai-siyasi sabitliyin bərpa olunması istiqamətində qardaş ölkəyə tələb olunan bütün dəstəyi verdi. Çünki Türkiyə Cümhuriyyətinin qurucusu Mustafa Kamal Atütürk “Azərbaycanın kədəri bizim kədərimiz, sevinci bizim sevincimizdir” və ümummilli lider Heydər Əliyev “Bir millət, iki dövlət” sloqanından çıxış edərək qurduqları bu birlik daimidir, əbədidir. Eyni zamanda bu birlik digər türk-müsəlman xalqları üçün bir nümunədir”, - deyə Prezidentin köməkçisi həmin gecə yaşananları xatırlayır.

Bu, iki dövlətin, bir millətin, Azərbaycan və Türkiyənin qardaşlıq nümunəsidir və bu qardaşlığın sözdə deyil, əməldə olduğu artıq sübut olunub.

“Azərbaycan dövləti və xalqı daim Türkiyə dövlətinin və millətinin yanındadır”

Milli Məclisin deputatı Musa Qasımlı Publika.az-a açıqlamasında bildirib ki, Türkiyədəki 15 iyul hadisələrinin ildönümü ilə əlaqədar olaraq cənab Prezidentimiz İlham Əliyevin Türkiyə Prezidenti Rəcəb Tayyib Ərdoğana ünvanladığı məktub bir daha göstərir ki, Azərbaycan dövləti və xalqı daim Türkiyə dövlətinin və millətinin yanındadır, qardaş ölkədə sabitliyin və davamlı inkişafın tərəfdarıdır: “Heç bir mübaliğəyə yol vermədən demək olar ki, bu gün Türkiyənin güclü olmasını daha çox istəyən dövlətlərin siyahısına Azərbaycan başçılıq edir. Azərbaycan xalqı Türkiyənin uğurlarına sevinir və onunla fəxr edir. Cənab Prezident İlham Əliyevin söylədiyi kimi, Türkiyənin güclü olması Azərbaycanın güclü olması deməkdir”.

M.Qasımlı əlavə edib ki, Türkiyədə baş verən hadisələrlə bağlı olaraq cənab Prezidentimiz İlham Əliyevin liderliyi altında Azərbaycan dövlətinin mövqeyi aydın, qəti və birmənalı olub və indi də belədir.

“Azərbaycan dövləti və xalqının mövqeyi eyni zamanda münasibətlərimizin səviyyəsini əks etdirən amillərdən biridir. Azərbaycan xalqı və dövləti Türkiyədə xaos, anarxiya və qarışıqlığın əleyhinədir”, - deyə o bildirib.

Asif Nərimanlı