Misir mətbuatı erməni cinayətlərindən yazdı

Misirin “Asia Əl Yom” və “Əl Diplomasi” portallarında “Azərbaycan Prokurorluğu mülki şəxslərin Ermənistanın basdırdığı minaya düşərək həlak olmaları ilə bağlı cinayət işi başlayıb” sərlövhəli xəbərlər yerləşdirilib.

Publika.az xəbər verir ki, Azərbaycan Respublikası Baş Prokurorluğunun məlumatına istinadla yayılan xəbərlərdə dekabrın 9-u Şuşa rayonu ərazisində 2 mülki şəxsin minaya düşməsi ilə bağlı prokurorluq orqanları tərəfindən aparılan ilkin araşdırma ilə “Voltac” podratçı şirkətinin əməkdaşı 1999-cu il təvəllüdlü Orxan Xanatov və “Cengiz İnşaat” MMC-nin əməkdaşı 1992-ci il təvəllüdlü Vüsal Qəndəliyevin həmin ərazidə təmir-tikinti işləri apararkən minaya düşmələri nəticəsində həlak olmalarının müəyyənləşdirildiyi qeyd edilib.

Xəbərlərdə Ermənistan silahlı qüvvələrinin Şuşanı tərk etməzdən əvvəl ətraf əraziləri minaladığı diqqətə çatdırılıb. Ərəbdilli oxuculara məlumat verilib ki, faktla bağlı Baş Prokurorluğun İstintaq İdarəsində Cinayət Məcəlləsinin xüsusi amansızlıqla və ya ümumi təhlükəli üsulla adam öldürmə və digər maddələri ilə cinayət işi başlanıb və hazırda iş üzrə intensiv istintaq hərəkətləri həyata keçirilir.