Ənənə zərərlidir: Ermənistanda nikah yaşını qaldırırlar

Ermənistan parlamentində nikah yaşının artırılmasının müzakirə olunduğu ictimai dinləmələr keçirilib.

Publika.az xəbər verir ki, təklif olunan dəyişikliklərin həmmüəllifi, deputat Rüstəm Bakoyan bildirib ki, milli azlıqlar, xüsusən də yezidi icması arasında erkən nikahların davam etməsi praktikasını nəzərə alaraq belə bir ehtiyac yaranıb.

"Evlilik üçün yaş həddinin artırılması yezidi icmasının üzləşdiyi çətinlikləri aradan qaldırmaq üçün vacibdir. Bizə zərər verən və komplekslər yaradan ənənələr var", - o qeyd edib.

Bakoyan əlavə edib ki, ona yezidi icmasının nümayəndələrindən erkən nikahlar və gəlin oğurluğu ilə bağlı çoxlu zənglər gəlir. O, bu praktikanı qəbuledilməz hesab edib. Öz növbəsində, Ermənistan ombudsmanı Anahit Avanesyan qeyd edib ki, erkən nikahlar, xüsusilə yezidi icmasında böyük faiz təşkil edir və bu səbəbdən bir sıra uşaq hüquqları pozulur. O hesab edir ki, problemin həlli üçün konkret addımların atılmasına ehtiyac var.

"Problem sistemlidir, ona görə də həll yolları hərtərəfli olmalıdır. Amma biz yumşaq metodologiyadan istifadə etməliyik", - ombudsman bildirib.

Öz növbəsində təhsil nazirinin müavini Araksiya Svaçyan bildirib ki, hazırda Ermənistanda məktəblərdə 1319 yezidi qız təhsil alır. Onun məlumatına görə, 2023-cü ildə onlardan 171 nəfəri məktəbə getməyi dayandırıb.

"Əsasən qızlar 10-12-ci siniflərdə məktəbi tərk edir. Belə ki, 9-cu sinifdən sonra yezidi qızlarının 52,7 faizi, 10-cu sinifdən sonra - 65,5 faizi, 11-ci sinifdən sonra isə 88,2 faizi məktəbi tərk edir", - nazir bildirib.

Qeyd edək ki, Ermənistanda nikah yaşı mövcud qanunvericiliyə görə 18 yaşdır. Valideynlərinin, övladlığa götürənlərin və ya qəyyumun razılığı olduqda şəxs 17 yaşında nikaha girə bilər.