Azərbaycan nümayəndə heyəti Daşkənddə Heydər Əliyevin abidəsini ziyarət etdi

Özbəkistanda səfərdə olan Azərbaycan nümayəndə heyəti noyabrın 14-də Daşkənd şəhərində yerləşən Heydər Əliyev meydanında olub.

Publika.az xəbər verir ki, rəsmilər Ümummilli Liderimizin abidəsini ziyarət edərək abidə önünə gül dəstələri qoyub, onun əziz xatirəsini ehtiramla anıblar. Sonra nümayəndə heyəti Daşkənddəki Heydər Əliyev adına Azərbaycan Mədəniyyət Mərkəzinə gələrək burada Ulu Öndərin büstünün önünə gül dəstələri düzüb.

Nümayəndə heyətinə mərkəzin fəaliyyəti, həyata keçirilən mədəniyyət layihələri, eləcə də Azərbaycan tarixini, milli mədəni və ədəbi irsini əks etdirən guşələr barədə ətraflı məlumat verilib. Mərkəzdə fəaliyyət göstərən yaradıcı kollektivlərin işləri də təqdim olunub, “Qarabağ Zəfəri” rəqs qrupu, “Xarıbülbül” teatr qrupu, rəssamlıq və Azərbaycan dili kurslarından söhbət açılıb.
Mərkəzin fəaliyyəti ilə bağlı müvafiq tapşırıq və tövsiyələrini verən nazir bildirib ki, Azərbaycanın xaricdəki mədəniyyət mərkəzləri mədəniyyətimizin təbliği, ölkələrimiz arasında humanitar əlaqələrin möhkəmləndirilməsi və mədəni inteqrasiyanın genişlənməsi baxımından mühüm missiya daşıyır. Daşkənddəki Mədəniyyət Mərkəzi də Azərbaycan-Özbəkistan dostluğuna, qardaşlığına öz töhfəsini verir.