Qarabağ

İrandan Azərbaycana Qarabağ təklifi

15 Yanvar 2021 11:53

İranla Azərbaycanın iqtisadi sahədə əməkdaşlığı daha da genişləndirmək üçün böyük imkanları var.

Publika.az “Mehr”ə istinadən xəbər verir ki, bunu İran parlament spikerinin xüsusi köməkçisi Hüseyn Əmir-Abollahyan Azərbaycanın Tehrandakı səfiri Bünyad Hüseynovla görüşündə deyib.

Tehranın Qarabağ münaqişəsi zamanı Azərbaycanın ərazi bütövlüyünü dəstəklədiyini xatırladan Əmir-Abollahyan münaqişənin sona çatmasının bölgəyə sülh və sabitlik gətirəcəyinə ümidvar olduğunu bildirib. Onun sözlərinə görə, İran şirkətləri inşaat sektorunda böyük potensiala malikdirlər və rəsmi Bakının Qarabağı bərpa etməsində kömək edə bilərlər. İranla Azərbaycan bölgələri arasındakı qısa məsafə İran firmalarına üstünlük qazandırır.

Tərəflər görüşdə regional inkişaf və qarşılıqlı maraq doğuran sahələrdə əməkdaşlığın genişləndirilməsi yolları barədə də fikir mübadiləsi aparıb.

Zümrüd