TIR-lar Sisiandadır, Laçın postuna doğru gəlirlər - İrəvanın “humanitar yük” təxribatı

Ermənistan hökuməti dünən Qarabağdakı separatçılara 400 ton “humanitar yardım” göndərmək qərarını qəbul edib. Bu gün artıq yüklənmiş TIR-lar Azərbaycan ərazilərinə doğru hərəkət edir.

Publika.az xəbər verir ki, Ermənistan mediası yüklərin Laçın postunda sülhməramlılara təhvil verilməsinin planlaşdırıldığını yazır.

Yük maşınları “Spyka” şirkətinə məxsusdur. Şirkətdən “Hraparak” nəşrinə bildiriblər ki, onlar yüklərin Qarabağa necə keçiriləcəyini bilmirlər.

“Bizə dedilər ki, yükləri çatdırın. Bu, dövlətin təşəbbüsüdür, yəqin ki, sülhməramlılarla razılaşdırılıb. Qalanını bilmirik, bizdən sadəcə maşınlar alınıb”, - şirkət bildirib.

Məlumatlara görə, TIR-lar artıq Sisiandadır. Lakin onların Laçın postundan necə keçəcəyi bəlli deyil.

Ermənistanın bu addımının təxribat xarakteri daşıdığı aydındır. Bakının Ağdam marşrutu təklifini qəbul etməyən rəsmi İrəvan “humanitar yük”ləri Laçın postunun qarşısına toplayaraq, “Azərbaycan yardımların keçməsinə imkan vermir” rəyini yaratmaq istəyir. Azərbaycan Dövlət Sərhəd Xidməti də dünən gözlənilən təxribatla bağlı açıqlama yaymışdı.

Asif