MDB ölkələrinin nümayəndə heyətləri Laçın şəhəri ilə tanış oldular

Mədəniyyət Nazirliyi və Laçın rayonunda Azərbaycan Respublikası Prezidentinin xüsusi nümayəndəliyinin təşkilatçılığı ilə 29-30 noyabr tarixlərində Laçın şəhərində “MDB-nin Mədəniyyət Paytaxtı – 2025” ilinin rəsmi bağlanış mərasimi keçirilir.

Publika.az xəbər verir ki, bağlanış tədbirlərində ölkəmizdən, Belarus, Qazaxıstan, Qırğızıstan, Özbəkistan, Rusiya və Tacikistandan nümayəndələr iştirak edirlər.

Noyabrın 29-da qonaqların Laçın şəhəri ilə tanışlığı olub. Dövlətimiz tərəfindən sürətlə qurulub dirçəldilən şəhərdəki "Hoçazfilm" studiyası, "Gilabi" Yaradıcılıq Mərkəzi, "Yurd" qalereyası kimi məkanlara baş çəkilib.

Laçın şəhərinin tarixi-mədəni və təbii zənginlikləri, Ermənistan tərəfindən işğalı və 44 günlük Vətən müharibəsində Qələbəmizin nəticəsində azad olunması, qısa müddətdə yenidən qurulması və keçmiş məcburi köçkünlərin mərhələli şəkildə doğma yurda qayıdışı haqqında ətraflı məlumat verilib.

Qeyd edək ki, MDB Humanitar Əməkdaşlıq Şurasının 2024-cü ilin 8 oktyabr tarixli qərarına əsasən, Azərbaycanın Şərqi Zəngəzur bölgəsinin Laçın şəhəri 2025-ci ildə “MDB-nin Mədəniyyət Paytaxtı” elan olunmuşdu.