Meymunçiçəyi virusunun Azərbaycana gəlməsi realdır - Həkim rəyi

“Meymunçiçəyi virusu da poksi viruslara aiddir və təbii çiçək virusu ailəsindəndir. Lakin pasiyent meymunçiçəyini təbii çiçək virusundan daha yüngül formada keçirir. Dəri üzərindəki səpkilər təbii çiçəyə daha çox oxşayır”.

Bunu Publika.az-a açıqlamasında tanınmış həkim Adil Qeybulla deyib.

Həkimin sözlərinə görə, ümumiyyətlə, meymunçiçəyi virusu Afrikada geniş yayılıb və hazırda dünyada bu virusun kliniki əlamətləri müxtəlif dəyişikliklərlə özünü göstərir: “Bu da müəyyən narahatçılıq yaradır. Əvvəllər bu şəpkilər əsasən üzdə, boyunda və əllərdə olurdusa, indi genitalidə, aralıq nahiyyəsində də təsadüf edilir. Ona görə müayinə zamanı bu amil nəzərə alınmalıdır. Hesab edirəm ki, bu virusun Azərbaycana gəlməsi realdır. Biz tam ehtiyatlı olmalıyıq və müəyyən prafilakitiki tədbirlər də görülməlidir. Konkret olaraq insanların maarifləndirilməsi istiqamətində işlər aparılmalıdır”.

A.Qeybulla vurğulayıb ki, məsələyə "bizdə ola bilməz" fikri ilə yanaşmaq doğru deyil: “Xəstəliyin Azərbaycana gəlməsi realdır və burada heç bir problem yoxdur. Əsas odur ki, vaxtında qabaqlayıcı tədbirlər görülsün. Prafilaktiki tədbirlər görməklə xəstəliyin yayılmasının qarşısını almaq, infeksiyanı vaxtında lokallaşdırmaq, eyni zamanda, xəstəliyə yoluxmuş şəxsləri izolyasiya etməklə virusun yayılmasının qarşısını almaq mümkündür. Hədəfimiz də bu olmalıdır. Təəssüf ki, maarifləndirmə işi çox aşağı səviyyədə aparılır. Efirdə mənasız şou-verilişləri yayımlamaqdansa, bu istiqamətdə insanların maarifləndirilməsinə diqqət yetirsək, daha yaxşı olar”.