Qırmızı.az
Media kapitanları Əli Həsənova nədən şikayətləndilər?
Azərbaycan Mətbuat Şurasında ölkənin aparıcı kütləvi informasiya vasitələri təmsilçilərinin Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənovla görüşü keçirilib.
Publika.Az xəbər verir ki, toplantını açan MŞ sədri Əflatun Amaşov
görüşün rəhbərlik etdiyi qurumun «Nazir-Redaktor dialoqu» layihəsi
çərçivəsində reallaşdırdığı tədbirlərdən biri olduğunu vurğulayıb.
O bildirib ki, Şura müxtəlif illərdə dövlət qurumlarının
təmsilçiləri ilə bu sayaq tədbirlər keçirib. Bu günkü toplantı isə
mətbuatın ən mühüm problemlərindən olan yayım məsələlərinə, qəzet
satışı ilə bağlı vəziyyətə həsr edilib.
Prezident Administrasiyasının ictimai-siyasi məsələlər şöbəsinin
müdiri Əli Həsənov Mətbuat Şurasındakı görüşdən məqsədin ölkənin
KİV rəhbərlərinin mediamızdakı mövcud problemlərlə bağlı
təkliflərini dinləməkdən ibarət olduğunu vurğulayıb.
Azərbaycan Respublikasının Milli Məclisinin deputatı, MŞ İdarə
Heyətinin üzvü, «Azərbaycan» qəzetinin baş redaktoru Bəxtiyar
Sadıqov çıxışında bildirib ki, yayımla əlaqədar problem heç də
müstəqil, iqtidaryönümlü və müxalifət qəzetlərinin üzləşdikləri
ayrı-ayrı çətinlik kimi dəyərləndirilməməlidir. Bu məsələ onların
hər biri üçün aktualdır. Konkret «Azərbaycan» qəzeti ilə əlaqədar
rəqəmlər üzərində dayanan B.Sadıqov nəşrin yayımından çoxsaylı
qayıdışın olduğunu deyib. Bu isə satış nöqtələrinin azalması ilə
bağlıdır. Yollardakı köşklər götürülüb. Olan köşklər də sanki qəzet
satmır. Azərbaycanın kəndlərinə isə qəzet ümumiyyətlə gedib
çıxmır.
B.Sadıqov Azərbaycan dövlətinin mətbuata həmişə qayğılı münasibət
göstərdiyini vurğulayıb. Mövcud istiqamətdəki konkret nümunələri
sadalayaraq onları iqtidarın qəzetçiliyə, jurnalistikaya önəm
verməsinin bariz nümunəsi kimi dəyərləndirib. Lakin sadalanan
halların yekunu olaraq meydana çıxan durum eyni zamanda maddi
sıxıntılara yol açır ki, son nəticə peşəkar jurnalist kadrların
sahədən uzaqlaşmalarına səbəb olur. Bu gün qəzet öz əməkdaşına
kifayət qədər əmək haqqı verə bilmirsə, sabah həmin vəziyyət ümumən
söz və mətbuat azadlığı ilə bağlı məsələlərə də öz təsirini
göstərəcək.
«Yeni Müsavat» qəzetinin baş redaktoru Rauf Arifoğlu çıxışında bir
müddət öncə bir neçə redaktorun ölkə prezidentinə müraciət
ünvanladığını xatırladaraq sənəddə irəli sürülən məsələlərin bu
günkü görüşdə müzakirəyə çıxarıldığını önə çəkib. O, əsasən
nəşrlərin səyyar satışında yaranan problemi qabardıb. Bu sahədəki
məhdudiyyətin rəhbərlik etdiyi qəzetin satışına mənfi təsir
göstərdiyinə dair faktlar açıqlayıb. «Eurovision-2012» ərəfəsində
metro stansiyalarındakı stendlərin yığışdırılması da «Yeni
Müsavat»a ziyan vurub. R.Arifoğlu iqtisadi çətinliyin spesifik
cəhətlərindən biri kimi reklam məsələsinə toxunub. O, reklamların
KİV-lərdə bölüşdürülməsi məsələlərinin tənzimlənməsinə ehtiyacın
duyulduğunu vurğulayıb. Baş redaktor həmçinin müxtəlif bölgələrdən
yayım firmalarına məxsus qəzet köşklərinin yerlərinə
qaytarılmasının vacibliyindən söhbət açıb.
«Azadlıq» qəzetinin baş redaktor müavini Rahim Hüseynov da əsasən
reklam məsələsi üzərində dayanaraq təmsil olunduğu 8 min tirajlıq
nəşrə nəyə görə reklam verilməməsinin anlaşılmaz qarşılandığını
diqqətə çatdırıb. Müstəqil mətbuatın mövcudluğunun hamı tərəfindən
dəyərləndirilməsinin vacibliyinə toxunan R.Hacıyev ölkənin
mediadakı problemlərin aradan qaldırılması üçün iqtisadi
plüralizmin mövcudluğunu vacib cəhət kimi önə çəkib.
MŞ İdarə Heyətinin üzvü, Azəri Press Agentliyinin (APA) baş
direktoru Vüsalə Mahirqızı çıxışında bir neçə məqam üzərində
dayanıb. O, «Reklam haqqında» Qanunda dövlət elan və reklamlarının
yalnız rəsmi mətbuatda dərcinə dair müddəanın aradan
qaldırılmasının vacibliyini vurğulayıb. Baş direktor eyni zamanda
hesab edib ki, medianın dövlət qurumlarının reklamlarının əldə
edilməsindəki açıq tenderlərə qatılmasına müvafiq imkanlar
yaradılmalıdır.
MŞ İdarə Heyətinin üzvü, «Ayna-Zerkalo» qəzetinin baş redaktoru
Elçin Şıxlı dövlət elan və reklamlarının ümumi reklamların çox az
qismini təşkil etdiyinə toxunaraq əsas potensial reklamçıların
digər təşkilatlar olduğunu bildirib. Onun sözlərinə görə, bir çox
sahələrdə inhisarçılıq mövcud olduğundan inhisar sahibləri
qəzetlərə reklam verməyi düşünmürlər də. Həmin problemlər aradan
qaldırılmalıdır.
«Bakinksi raboçi» qəzetinin baş redaktoru Rəhman Hacıyev eyni
zamanda «1news.az» saytına da rəhbərlik etdiyini bildirərək
qəzetdən fərqli olaraq saytda reklamlarının həddən artıq çoxluğunu
önə çəkib. Əsas məsələ odur ki, qəzetlərə reklam verilmir. Bu isə
hansısa inhisarçı fəaliyyətlə bağlı deyil, onların yayımı ilə
əlaqədardır. Qəzetlər oxucuya müntəzəm şəkildə çatdırılsalar,
reklam verənlər də onlara maraq göstərəcək.
Azərbaycan Respublikasının Milli Məclisinin deputatı, MŞ İdarə
Heyətinin üzvü, «Ədalət» qəzetinin təsisçisi Aqil Abbas çıxışında
əsasən qəzetlərin yayım firmaları ilə münasibətlərindəki durumdan
söhbət açıb.
«Super market» qəzetlər qrupunun rəhbəri Etibar Bağırov əsasən
səyyar satış işinin gücləndirilməsinin vacibliyini bildirərək əldə
yayımın eyni zamanda qəzetlərin təbliği baxımından da vacibliyini
önə çəkib.
«Qaya» Mətbuat Yayımının rəhbəri Xanhüseyn Əliyev rəhbərlik etdiyi
firmanın paytaxtdakı və eləcə də ölkənin bir sıra yerlərindəki
köşklərinin götürüldüyünü xatırladıb. O, qəzet yayımında mühüm rol
oynayan təşkilatın vəziyyətinin nəşrlərin satışına da mənfi təsir
göstərdiyini vurğulayıb və bu durumun aradan qaldırılmasının
zəruriliyini deyib.
«Xalq qəzeti»nin baş redaktoru Həsən Həsənov isə çıxışında bildirib
ki, əsas məqam reklam yolu ilə qəzetlərin durumunun
yaxşılaşdırılmasıdır və nəşrlərin reklamlarla təmin edilməsinin
konkret mexanizminin formalaşması hər cəhətdən faydalıdır. Baş
redaktor qanunvericilikdə dövlət təşkilatlarının büdcəsinin bir
faizinin informasiya təbliğat məsələlərinə yönləndirilməsi
prosedurunun tətbiqinin nəzərdən keçirilməsinin vacibliyini
vurğulayıb.
PA-nın şöbə müdiri Əli Həsənov medianın problemlərinin həllinin
Azərbaycan dövləti üçün prioritetliyini bildirərək bu günkü
toplantıda səslənən təkliflərin ümumiləşdirilmiş formada müvafiq
qurumlara çatdırılacağını deyib. O, metro stansiyalarında qəzet
stendlərinin yerləşdirilməsi məsələsinin tez bir zamanda həllinin
mümkünlüyünü ifadə edib. Digər məqamlarla əladəqar söz açan PA
rəsmisi bildirib ki, hər bir rayon icra başçısı və ya hansısa
bölgəyə məsul şəxs həmin yerin inkişafı məsələsinə müxtəlif cür
yanaşır. Bəziləri hesab edirlər ki, qəzet köşkləri ümumi görünüşə
xələl gətirir, bəziləri başqa cür düşünür. Hər bir halda bu kimi
məsələlər müzakirələr yolu ilə həllini tapmalıdır. Haqqında söhbət
açılan və «Reklam haqqında» Qanunda dəyişikliyin nəzərdə tutulması
ilə əlaqədar təklifə gəlincə, Ə.Həsənov da hesab edib ki, dövlət
qurumlarının elan və reklamlarının yalnız rəsmi mətbuatda dərcinə
dair müddəa aradan qaldırıla bilər. O, Mətbuat Şurasının elan və
reklamların bölüşdürülməsi ilə bağlı Türkiyə təcrübəsini
öyrəndiyini və bununla bağlı məsələlərə Azərbaycan dövlətinin də
dəstək verdiyini bildirərək mövcud istiqamətdə ayrıca qurumun
formalaşdırılmasının mümkünlüyünü diqqətə çatdırıb.
Bütün dünyada qəzetlərin satışdan çox reklamlardan gəlir əldə
etdiyindən söhbət açan Ə.Həsənovun sözlərinə görə, əgər
Azərbaycanın KİV-ləri bu axara düşə bilsələr, onlar üçün
məhsullarının satışı o qədər də önəm daşımayacaq. Şöbə müdiri
hazırkı dövrdə internet nəşrlərin ənənəvi medianı sıxışdırması ilə
bağlı tendensiyanın aktual səciyyə daşıdığından söz açaraq bunu həm
də texnoloji hadisə kimi dəyərləndirib. O, ölkə KİV-lərini
vəziyyətlə ayaqlaşmağa, daha çox özlərinin internet resurslarını
təkmilləşdirməyə çağırıb.
Azərbaycan dövlətinin, şəxsən prezident İlham Əliyev cənablarının
hər zaman mətbuatın problemlərinə həssas yanaşdığını deyib. PA
rəsmisi özünün də hər zaman medianın üzləşdiyi çətinliklərin
həllinə çalışdığını bildirib. O, buna görə də mətbuata gileyini
söyləmək haqqına sahibliyini deyib. Bu mənada «Eurovision-2012»
zamanı Azərbaycanda siyasi məhbus məsələsini qaldıran bəzi
KİV-lərin eyni zamanda Xocalı və Qarabağ həqiqətlərini də
tirajlayan məlumatlar verməsinin zəruriliyini vurğulayıb. Bunun
müşahidə edilməməsindən təəssüfünü ifadə edib.
Görüşün sonunda belə qərara gəlinib ki, Mətbuat Şurası səslənən
təklifləri ümumiləşdirsin və KİV təmsilçiləri adından dövlət
rəhbərliyinə müvafiq müraciət ünvanlansın.
Publika.Az
-
Region10:10
Rusiyadakı azərbaycanlılara PİS XƏBƏR - Bu sahələrdə işləmək qadağan edildi
-
Cənubi Qafqaz09:48
Rusiya bu həftə Paşinyanı devirəcək - Şok iddia
-
Hadisə09:21
Məktəb binasında yanğın
-
Sosial08:43
Azərbaycanın tanınmış professoru vəfat etdi - FOTO
-
Magazin208:36
Kristofer Nolan cəngavər olacaq, xanımı isə... - FOTO
-
Ekologiya07:17
Bu günə olan hava PROQNOZU - 20 dərəcə isti
-
Magazin206:16
Leonardo Di Kaprio ilə sevgilisi arasında NƏ BAŞ VERİR?
-
Səhiyyə05:15
Ömrü uzadan pəhriz sınaqdan UĞURLA ÇIXDI