Vaşinqtonun Ankaraya qarşı yalnız bir "kozır"ı qaldı - "Sabah"dan ŞOK YAZI

Dəyişən dünyada Vaşinqtonun yalnız bir "kozır" kartı var - təhdidlər dili, lakin bu, artıq o qədər də təsirli deyil.

Publika.az xəbər verir ki, bu barədə Türkiyənin "Sabah" qəzetinin məqaləsində deyilir .

Müşahidəçinin fikrincə, ABŞ-ın xarici siyasəti son zamanlar sürətini itirməyə başlayıb. Bunun sübutu odur ki, hər fürsətdə yumşaq gücü ilə öyünən Vaşinqtonun indi əlində yalnız bir "kozır" qalıb: təhdid dili.

Məqalədə ABŞ-ın uzun müddət birtərəfli sanksiyalardan tutmuş hərbi işğala və beynəlxalq təcridə qədər müxtəlif təsir növlərindən istifadə etdiyinə diqqət çəkilib. Vaşinqton bu vasitələrin bəzilərini Türkiyəyə tətbiq etməyə çalışdı, lakin 2016-cı ildəki çevriliş cəhdindən sonra “tamamilə fərqli” Ankara ilə qarşılaşdılar. Buna görə də ABŞ indi Türkiyəyə münasibətdə təhdid və şərtlər dilinə əl atır, çünki başqa heç nə qalmayıb.

"Bunu etməsən, onu verməyəcəyik, dayanmasan, ödəyəcəksən" ruhunda. Biz Rusiyanın S-400 hava hücumundan müdafiə sistemlərini alarkən belə ritorika ilə tez-tez rastlaşırdıq", - deyə müşahidəçi xatırladıb və indi bu üsuldan yenidən istifadə olunduğunu vurğulayıb.

Belə ki, oxşar proses Türkiyənin ABŞ-dan tələb etdiyi "F-16" döyüş təyyarələri ilə bağlı da müşahidə olunur: saziş Konqresdə təsdiqlənəndə amerikalı senatorlar onun təsdiqi üçün şərtlər irəli sürməyə başladılar: yalnız Ankaranın İsveç və Finlandiyanın NATO-ya üzvlüyünü təsdiqlədiyi təqdirdə...

Türkiyə bu səylərin nəticəsiz qalacağını, ölkənin başqa alternativləri nəzərdən keçirib, öz imkanlarını inkişaf etdirəcəyini açıq şəkildə bildirdi.

“Və nə qədər ki, Türkiyədə belə bir baxış var, heç bir təhdid bizi qorxutmayacaq”, - deyə müəllif yekunlaşdırıb.

Hüseyn İbadlı