İran dağıdıcı müharibəyə hazırdır: Kifayət qədər silah toplayıb

İran Müdafiə Nazirliyinin sözçüsü Rza Talai-Nik bildirib ki, ölkənin silah istehsalı gücü davamlı hərbi əməliyyatların ehtiyaclarını ödəmək üçün kifayətdir.

Publika.az xəbər verir ki, Talai-Nik dövlət televiziyasına verdiyi müsahibədə bildirib ki, "Hazırda istehsal sistemimiz uzun və davamlı müharibə aparmaq gücünə malikdir".

Onun sözlərinə görə, ABŞ-a qarşı hərbi əməliyyatlar zamanı silah istehsalının həcmi 2,5 dəfə artıb. O əlavə edib ki, ölkə əvvəlcədən təhlükəsiz ehtiyat istehsal sahələri hazırlayıb və bu da hərbi istehsalın fasiləsiz davam etməsini təmin edib.

O bildirib ki, təxminən 9000 şirkət hərbi istehsal prosesinə könüllü olaraq qoşulub.

Sözçü qeyd edib ki, Müdafiə Nazirliyinin mütəxəssisləri raket sistemi ekipajları, PUA bölmələri, Hərbi Dəniz Qüvvələri və Hərbi Hava Qüvvələri ilə birlikdə döyüş təcrübəsindən istifadə edərək, ortaya çıxan təhdidləri aradan qaldırmaq üçün silah və avadanlıqları modernləşdirirlər.

İran Müdafiə Nazirliyinin sözçüsü vurğulayıb ki, Tehran öz hərbi ehtiyaclarını ödəməyə üstünlük verəcək, eyni zamanda artıq müdafiə məhsullarını ixrac etməyi planlaşdırır.

Müəllif: Tural