Yeni bir infeksiya yayıldı

Rusiyada Çin və Hollandiyada yayılan mikoplazma infeksiyasının xüsusi halları qeydə alınıb.

Publika.az Rusiya mediasına istinadən xəbər verir ki, "Rospotrebnadzor" (İstehlakçıların Hüquqlarının Müdafiəsi və İnsan Rifahına Nəzarət Federal Xidməti) xəstəliyin ağır formalarının hələ müşahidə olunmadığını açıqlayıb.

Lakin infeksiyaya hazır olmaq üçün həkimlər infeksiyanın əsas əlamətlərini ictimaiyyətə açıqlayıblar. Rusiya Xalqlar Dostluğu Universitetinin (RUDN) yoluxucu xəstəliklər kafedrasının dosenti Sergey Voznesenski qeyd edib ki, simptomlar özünü müxtəlif yollarla göstərə bilər.

“Mikoplazma infeksiyası tamamilə fərqli şəkildə özünü göstərə bilər. Bəziləri üçün bu, yüngül yuxarı tənəffüs yollarının infeksiyası, bəziləri üçün isə kifayət qədər ağır gedişatlı pnevmoniya ola bilər, hər şey sırf fərdidir", - həkim "RİA Novosti"yə açıqlamasında bildirib.

Voznesenski əlavə edib ki, xəstəliyin əsas əlamətləri qızdırma, burun tıxanması, boğaz ağrısı, intoksikasiya, öskürək və təngənəfəslikdir. Həmçinin laboratoriya testləri olmadan, mikoplazma infeksiyasının mövcudluğunu müəyyən etmək çox çətindir.​

Aytən Məftun