2 ayda 2 milyon insan öldü - Şok statistika açıqlandı

Fred Hutchinson Xərçəng Mərkəzinin araşdırmasına görə, 2022-ci ilin dekabrından 2023-cü ilin yanvarına qədər Çində 30 yaşdan yuxarı insanlar arasında təxminən 1,87 milyon ölüm qeydə alınıb.

Publika.az "Euronews"a istinadən xəbər verir ki, ABŞ-da aparılan araşdırmaya görə, Çinin Covid-19 epidemiyası zamanı həyata keçirdiyi “Sıfır-Covid” (Zero-Case) siyasətindən qəfil imtina etməsinin ardından iki ay ərzində 2 milyon insan ölüb.

Çinin bəzi universitetləri tərəfindən dərc edilən ölüm məlumatları və internet axtarışları faktı təsdiqləyib. Araşdırmaya görə, 2022-ci ilin dekabrından 2023-cü ilin yanvarına qədər 30 yaşdan yuxarı insanlar arasında təqribən 1,87 milyondan artıq ölüm baş verib. Ölüm hadisəsi Tibet istisna olmaqla, Çinin bütün əyalətlərində müşahidə olunub. Ölümlər əsasən yaşlı insanlar arasında olub.

Çinin Milli Səhiyyə Komissiyası hesabatla bağlı şərh tələbinə cavab verməyib. Qlobal səhiyyə mütəxəssisləri dəfələrlə Çini real rəqəmləri açıqlamağa çağırıblar. Çin 2022-ci ilin sonunda rəsmi gündəlik ölüm nəticələrini bildirməyi dayandırıb. ÜST Çində 121 min 628 nəfərin “Covid-19”dan öldüyünü və bu rəqəmin qlobal miqyasda təxminən 7 milyon olduğunu bildirib.

Nadir bir addım olaraq, Çinin bir əyaləti iyul ayında öz saytında bu ilin birinci rübündə kremasiya əməliyyatlarının 70 faiz artdığını göstərən məlumatları dərc edib, lakin məlumat tezliklə rəsmi saytından silinib.

Aysel Şahmar