Fransada abort qərarı: Mənim bədənim, mənim seçimimdir

Fransada abort hüququnun konstitusiyaya daxil edilməsi ilə bağlı tək maddədən ibarət qanun layihəsi Konqresdə qəbul edilib.

Publika.az xəbər verir ki, abort hüquqları ilə bağlı qanun layihəsi Konqresdə 72 əleyhinə olmaqla, 780 səslə təsdiqlənib.

Fransa prezidenti Emmanuel Makron sosial media hesabında etdiyi paylaşımda “konstitusiya zəmanətini” qeyd etmək istədiyini bildirib.

Baş nazir Qabriel Attal da qanunun qəbulu ilə "Fransa dünyaya tarixi mesaj verdi" deyərək, qadınların da öz bədənləri üzərində söz sahibi olmaq hüququna malik olduğu mesajını verib.

Qanun qəbul edildikdən sonra paytaxtın simvollarından biri olan Eyfel qülləsinin üzərinə “Mənim bədənim, mənim seçimimdir” mətni proyeksiya edilib.

Qeyd edək ki, Fransa Konstitusiyasına abort hüququnun daxil edilməsi ilə bağlı bir maddədən ibarət qanun layihəsi yanvarın 30-da Milli Assambleyada, fevralın 28-də isə Senatda qəbul edilib. Fransada qadınlar qanuni olaraq hamiləliyin 14-cü həftəsinə qədər abort edə bilərlər. Qanun layihəsinin təsdiqi ilə Fransa “abort hüququnu konstitusiya ilə təmin edən ilk ölkə” oldu.

Aysel Şahmar