Artıq çəkinin irsi olub-olmadığı məlum oldu

Norveçin Tromso Universitetinin alimləri müəyyən ediblər ki, valideynlərdən birinin kök olması uşağın bu xəstəliyə tutulma riskini üç dəfə artırır. Bunun səbəbi təkcə genlər deyil, həm də həyat tərzidir.

Publika.az xəbər verir ki, araşdırmanın nəticələri "Obesity" jurnalında dərc olunub.

Tədqiqatda 40-59 yaş arası iki mindən çox insan iştirak edib. Alimlər subyektlərin sağlamlığı və çəkisi haqqında məlumat toplayıb, həmçinin onların valideynlərinin kök olub-olmadığını öyrəniblər. Məlumatların təhlili göstərib ki, hətta bir obez valideynin olması uşaqlarda bu xəstəliyin inkişaf riskini üç dəfə artırır.

Tədqiqat müəllifləri qeyd ediblər ki, genlər çəki artımına həssaslıqda mühüm rol oynayır. Ancaq piylənmənin səbəbinin həmişə ona genetik meyldə olduğunu söyləmək olmaz. Əksər hallarda çəki artımı ailədə kök salmış pis qidalanma tərzindən qaynaqlanır. Bunlara yağlı, yüksək kalorili qidaların tez-tez istehlakı və passiv istirahətə üstünlük verilməsi daxildir.

Hüseyn İbadlı